ការថ្វាយបង្គំ៖ មេរៀនសិក្សាតាមទំនុកតម្កើងគំរូ

តើទំនុកតម្កើងនេះថ្លែងពីអ្វី?

ចូរថ្វាយសិរីរុងរឿង ដ្បិតព្រះនាមរបស់ព្រះអង្គសក្ដិសមនឹងទទួល ហើយចូរថ្វាយបង្គំ ចំពោះភាពដ៏ត្រចះត្រចង់នៃភាពបរិសុទ្ធរបស់ព្រះអង្គ។ ព្រះអង្គគង់នៅលើបល្ល័ង្ក ក្នុងនាមជាព្រះមហាក្សត្រអស់កល្បជានិច្ច ទាំងប្រទានកម្លាំងនិងក្ដីសុខសាន្ដទៅដល់ប្រជារាស្រ្តរបស់ព្រះអង្គផង។

តើទំនុកតម្កើងនេះមានន័យយ៉ាងណា?

ស្ដេច ដាវីឌ ប្រាកដជាបានតាក់តែងទំនុកតម្កើងនេះឡើង បន្ទាប់ពីគាត់បានមើលឃើញព្យុះសង្ឃរា បានបក់បោកមកពីសមុទ្រនោះហើយ។ ផ្លេកបន្ទោរ និងផ្គរលាន់ បានបង្ហាញពីសិរីរុងរឿងនៃព្រះ ទាំងបណ្ដាលឱ្យ ស្ដេច ដាវីឌ នៅឈប់មួយកន្លែង រួចថ្វាយការថ្វាយបង្គំដល់ព្រះអាទិករ ទោះបើគាត់ត្រូវស្ថិតនៅត្រង់ភាពហិនហោចនៃព្យុះនោះក៏ដោយ។ គាត់ពិតជាទទួលបាននូវភាពស្ញប់ស្ញែង នៅពេលដែលខ្យល់បក់ និងទឹកភ្លៀងត្រូវបានបញ្ឈប់នាគ្រាចុងក្រោយ។ ព្រះជាម្ចាស់ដដែល ដែលគ្រប់គ្រងលើទឹកជន់ជោរដ៏មហិមានាសម័យលោកតា ណូអេ នោះទ្រង់បានបង្កើតនូវព្យុះសង្ឃរានេះ។ ស្ដេច ដាវីឌ បានស្វែងរកឃើញនូវសេចក្ដីសុខសាន្ត នៅត្រង់ទីចំណុចកណ្ដាលនៃព្យុះសង្ឃរា ដែលមាននៅក្នុងជីវិតផ្ទាល់របស់គាត់ ហើយគាត់បានស្វែងរកឃើញកម្លាំង ដើម្បីបម្រើព្រះ ដែលជាអម្ចាស់គ្រប់គ្រងលើរាល់អ្វីៗទាំងអស់។

តើខ្ញុំត្រូវឆ្លើយតបយ៉ាងណា?

យើងទទួលបានការបើកសម្ដែងជាច្រើនហេតុផល ដើម្បីឱ្យយើងអាចថ្វាយការសរសើរតម្កើង និងការថ្វាយបង្គំដល់ព្រះ នៅពេញមួយថ្ងៃ។ អំណាចចេស្ដា និងសិរីរុងរឿងរបស់ព្រះ បានស្ដែងបង្ហាញជាសាក្សីយ៉ាងច្បាស់ នៅក្នុងទិដ្ឋភាពជាច្រើននៃរបស់សព្វសារពើដែលព្រះបានបង្កើត ទាំងការណ៍អស់ទាំងនោះ ប្រទានឱ្យយើងមើលឃើញពីរូបភាពនៃរបៀបដែលព្រះធ្វើការនៅក្នុងជីវិតជាប្រចាំថ្ងៃរបស់យើង – ប្រៀបដូចជា ស្ដេច ដាវីឌ បានមើលឃើញនៅក្នុងព្យុះសង្ឃរា នោះផងដែរ។ តើអ្នកអាចមើលឃើញពីទម្រង់ទ្រង់ទ្រាយនៃធម្មជាតិ និងរបស់សព្វសារពើដែលព្រះបានបង្កើត ពីបង្អួចនៃផ្ទះសម្បែង ការិយាល័យធ្វើការ ឬសាលារៀនរបស់អ្នកនៅថ្ងៃនេះ ដែរឬទេ? តើរូបទាំងនោះបានរំឭកបង្ហាញពីធាតុអ្វីខ្លះនៃចរិតលក្ខណៈរបស់ព្រះ ដើម្បីឱ្យអ្នកអាចថ្វាយការសរសើរតម្កើងដល់ព្រះបាន? យើងអាចស្វែងរកឃើញការកម្សាន្តចិត្ត កម្លាំង និងសេចក្ដីសុខសាន្ត ទាំងដឹងថាយើងអាចបម្រើព្រះដដែល ដែលជាព្រះបានបង្កើត និងគ្រប់គ្រងលើរាល់រឿងអច្ឆរិយៈនៃធម្មជាតិនៃពិភពលោក។ តើអ្នកនឹងថ្វាយបង្គំព្រះដ៏ជាព្រះមហាក្សត្រដោយរបៀបណាដែរ នៅថ្ងៃនេះ?