ការថ្វាយបង្គំ៖ មេរៀនសិក្សាតាមទំនុកតម្កើងគំរូ

តើទំនុកតម្កើងនេះថ្លែងពីអ្វី?

ព្រះអម្ចាស់បានស្ដាប់នៅពេលដែល ដាវីឌ បានស្រែករកព្រះអង្គ ក្នុងគ្រាគាត់មានទុក្ខព្រួយ។ ព្រះអង្គបានផ្ដល់ជារង្វាន់នៃក្ដីសុចរិតដល់ ដាវីឌ ដោយព្រះអង្គទ្រទ្រង់ និងផ្ដល់អំណាចឱ្យគាត់អាចយកឈ្នះលើខ្មាំងសត្រូវរបស់គាត់។

តើទំនុកតម្កើងនេះមានន័យយ៉ាងណា?

នៅគ្រាចុងក្រោយ ដាវីឌ បានទទួលការតែងតាំង ធ្វើជាស្ដេចនៃពួកសាសន៍អ៊ីស្រាអែល។ ខ្មាំងសត្រូវដែលបន្តប្រឆាំងរូបគាត់ ទាំងបង្ខំឱ្យគាត់ត្រូវលាក់ខ្លួន នោះត្រូវបានកម្ចាត់ចោល បូករួមទាំង ស្ដេច សូល ផងដែរ។ ប៉ុន្តែ ព្រះបាទដាវីឌ មិនគ្រាន់តែបានបន្តទៅស្នើសុំសំណូមពរមួយថ្មីនោះទេ តែគាត់បានទូលសូមព្រះសម្រាប់ព្រះគុណ ដើម្បីឱ្យគាត់អាចគ្រប់គ្រងលើអាណាចក្ររបស់គាត់។ ព្រះបាទដាវីឌបានបង្អង់ខ្លួន រួចបានតាក់តែងចម្រៀងអំពីសេចក្ដីស្មោះត្រង់នៃព្រះ។ ព្រះមហាក្សត្រថ្មីនៃប្រជាជាតិអ៊ីស្រាអែល បានផ្ដើមការគ្រងរាជ្យរបស់ទ្រង់ ដោយប្រកាសនិងថ្វាយសិរីរុងរឿដល់ព្រះ ជាសាធារណៈ សម្រាប់ជ័យជម្នះរបស់គាត់។ គាត់បានចាប់ផ្ដើមពីពាក្យពេចន៍យ៉ាងសាមញ្ញ ប៉ុន្តែពាក្យពេចន៍ទាំងនោះ ពិតជាមានអត្ថន័យយ៉ាងជ្រាលជ្រៅ៖ «ទូលបង្គំស្រឡាញ់ទ្រង់ ឱ ព្រះអម្ចាស់! ទ្រង់ជាកម្លាំងរបស់ទូលបង្គំ»។ បន្ទាប់មក គាត់បានបន្តថ្លែងដល់អស់ ៥០ ខទៀត អំពីរបៀបដែលព្រះជាម្ចាស់បានមើលថែរក្សា បានផ្ដល់កម្លាំង និងបានសងសឹកជំនួសរូបគាត់ – ទាំងបញ្ចប់ដោយការសារភាពពីព្រះទ័យយ៉ាងសប្បុរស មិនចេះឈប់ឈររបស់ព្រះជាម្ចាស់ផង។

តើខ្ញុំត្រូវឆ្លើយតបយ៉ាងណា?

ដូចទំនុកតម្កើងជាច្រើនរបស់ ដាវីឌ នោះចូរយើងអធិស្ឋានដោយទៀងត្រង់ នៅពេលណាដែលសម្ពាធ និងភាពឈឺចាប់កើនឡើងយ៉ាងធ្ងន់ធ្ងរ។ ជារឿយៗ ពេលដែលព្រះប្រទានការសម្រាលទុក្ខភ្លាមៗ នោះយើងប្រឹងមានចលនាយ៉ាងឆាប់រហ័សដែរ។ តើមានភាពជោគជ័យណាខ្លះ ដែលព្រះបានប្រទានដល់អ្នក នៅក្នុងរយៈពេលប៉ុន្មានខែ ឬប៉ុន្មានសប្ដាហ៍ចុងក្រោយនេះ? វាអាចជាអ្វីមួយដែលធំធេងខ្លាំង នៅក្នុងសាច់រឿងនៃជីវិតរបស់អ្នក ឬក៏គ្រាន់តែជារឿងតូចតាច ប៉ុន្តែជាជ័យជម្នះដ៏ចាំបាច់។ តើអ្នកមានបានប្រឹងចែករំលែកជាមួយអ្នកដទៃផ្សេងទៀត ពីអ្វីដែលបានកើតឡើង រួចហើយថ្វាយការសរសើរតម្កើងដល់ព្រះ សម្រាប់លទ្ធផលទាំងនោះ ដែរឬទេ? ភាពស្មោះត្រង់និងក្ដីសប្បុរសនៃព្រះ ពិតជាសក្ដិសមឱ្យយើងអបអរសាទរ។ ចូរធ្វើតាមគំរូរបស់ព្រះបាទដាវីឌ រួចចាប់ផ្ដើមដោយគ្រាន់តែថ្លែងទៅព្រះ ថាអ្នកស្រឡាញ់ព្រះអង្គខ្លាំងប៉ុណ្ណា នៅថ្ងៃនេះ។