ការថ្វាយបង្គំ៖ មេរៀនសិក្សាតាមទំនុកតម្កើងគំរូ

តើទំនុកតម្កើងនេះថ្លែងពីអ្វី?

រូបសំណាក់ព្រះក្លែងក្លាយ ដែលធ្វើដោយដៃមនុស្ស នៅតាមបណ្ដាប្រជាជាតិទាំងឡាយ នោះគ្មានជីវិត ប៉ុន្តែព្រះនៃស្ថានសួគ៌ ទ្រង់គឺជាជំនួយនិងជាខែលនៃរាស្រ្តអ៊ីស្រាអែល។ កវីទំនុកតម្កើងបានលើកសរសើរតម្កើងព្រះគុណ សេចក្ដីសុចរិត និងក្ដីមេត្តាករុណារបស់ព្រះជាម្ចាស់។

តើទំនុកតម្កើងនេះមានន័យយ៉ាងណា?

ជនជាតិអ៊ីស្រាអែលមានប្រពៃណីច្រៀងនូវទំនុកតម្កើងទាំងនេះ នៅគ្រាគេប្រារព្ធពិធីបុណ្យចម្លង។ អត្ថបទគម្ពីរទាំងនេះបានរំឭកដល់ប្រជារាស្រ្តរបស់ព្រះ ថាពួកគេជាក្រុមមនុស្សផ្សេងពីប្រជាជាតិដទៃដែលនៅព័ទ្ធជុំវិញ ដោយសារតែព្រះរបស់ពួកគេ គឺជាព្រះដែលបានបង្កើតស្ថានសួគ៌ហើយនិងផែនដី។ រាល់គ្រប់សិរីរុងរឿងគឺជាកម្មសិទ្ធិរបស់ព្រះអង្គ ពីគ្រាឥឡូវរហូតដល់អស់កល្បជានិច្ច។ ក្ដីស្រឡាញ់និងភាពស្មោះត្រង់របស់ព្រះអង្គ បានជំរុញឱ្យពួកគេអាចទុកចិត្ត និងស្ដាប់បង្គាប់ព្រះអង្គទាំងស្រុង។ ព្រះយេស៊ូ(វ) បានច្រៀងពីទំនុកតម្កើង ១១៦ រួមជាមួយនឹងពួកសិស្សរបស់ព្រះអង្គ នៅគ្រានៃពេលអាហារចុងក្រោយរបស់ព្រះអង្គ ទាំងដឹងថាពេលវេលានៃការត្រូវសុគតរបស់ព្រះអង្គ ជិតមកដល់ហើយ។ ព្រះអង្គបានលើក "ពែងនៃសេចក្ដីសង្គ្រោះ" ឡើង ហើយបន្តិចក្រោយមក ព្រះអង្គបានសម្រេចភារកិច្ច ដែលព្រះជាម្ចាស់បានប្រទានដល់ទ្រង់ ពេញដោយព្រះគុណនិងក្ដីមេត្តាករុណា ដោយព្រះអង្គស្ម័គ្រព្រះទ័យ បានសុគតសម្រាប់អំពើបាបរបស់មនុស្សលោក នៅឯលើឈើឆ្កាង។

តើខ្ញុំត្រូវឆ្លើយតបយ៉ាងណា?

នៅក្នុងសង្គមសព្វថ្ងៃ មានគេខំប្រឹងប្រែងយ៉ាងខ្លាំង ក្នុងការដកហូតស្លាកស្នាមរបស់ព្រះ – ដូចដែលបានបើកសម្ដែងនៅក្នុងអត្ថបទព្រះគម្ពីរ – ចេញពីប្រព័ន្ធ រាជរដ្ឋាភិបាល សាលារៀន និងប្រព័ន្ធយុត្តិធម៌។ អ្នកមិនអាចផ្លាស់ប្រែពិភពលោកបានទេ ប៉ុន្តែព្រះជាម្ចាស់អាចបំផ្លាស់បំប្រែអ្នកបាន។ អ្នកជឿគួរតែមានលក្ខណៈខុសប្លែកពីគេ ដោយសារតែព្រះជាម្ចាស់គឺជាព្រះអាទិករ ជាព្រះសង្គ្រោះ ជាព្រះអម្ចាស់ ហើយនៅថ្ងៃណាមួយ ព្រះអង្គនឹងសោយរាជ្យនៅលើផែនដី ក្នុងនាមជាព្រះមហាក្សត្រ។ ដោយសារតែការសុគត ការបញ្ចុះក្នុងផ្នូរ និងការរស់ឡើងវិញរបស់ព្រះគ្រីស្ទ នោះអ្នកអាចមានសេរីភាពចេញពីភាពភ័យខ្លាចនៃសេចក្ដីស្លាប់បាន។ តើនៅក្នុងរបៀបណាខ្លះ ដែលអ្នកបានឆ្លើយតបទៅដល់ព្រះ ទាំងជឿទុកចិត្ត ហើយនិងស្ដាប់បង្គាប់? តើអ្នកអាចបង្ហាញពីការដឹងគុណចំពោះព្រះគុណ ក្ដីសុចរិត និងក្ដីសន្ដោសមេត្តារបស់ព្រះអង្គ ដោយរបៀបណាដែរនៅថ្ងៃនេះ?