ការថ្វាយបង្គំ៖ មេរៀនសិក្សាតាមទំនុកតម្កើងគំរូ

តើទំនុកតម្កើងនេះថ្លែងពីអ្វី?

កវីទំនុកតម្កើងនឹងលើកសរសើរតម្កើង និងទុកចិត្តព្រះអម្ចាស់ អស់មួយជីវិតរបស់គាត់ ដោយសារតែក្ដីស្មោះត្រង់របស់ព្រះអង្គនៅស្ថិតស្ថេរជានិច្ច។ គាត់បានជំរុញឱ្យសាសន៍អ៊ីស្រាអែល លើកសរសើរតម្កើងព្រះ ដោយព្រោះតែការបើកសម្ដែងពីក្រឹត្យវិន័យ ហើយនិងព្រះបន្ទូលរបស់ព្រះអង្គ។

តើទំនុកតម្កើងនេះមានន័យយ៉ាងណា?

នេះជារឿងដែលមនុស្សទូទៅបានសន្មត ចំពោះទំនុកតម្កើង ៥ ជំពូកចុងក្រោយនេះ ដោយថា វាបានសរសេរឡើង បន្ទាប់ពីព្រះវិហារទីពីរត្រូវបានសាងសង់រួច ហើយជញ្ជាំងនៃក្រុងយេរូសាឡឹមត្រូវបានសាងសង់ឡើង។ ហើយនេះគឺជាការពន្យល់ចំៗ សម្រាប់ហេតុផល ថាហេតុអ្វីបានជាទំនុកតម្កើងទាំងនោះ បានចាប់ផ្ដើមដោយពាក្យពេចន៍ជាក់លាក់មួយចំនួនទាំងនេះ៖ «សូមសរសើរតម្កើងព្រះ»។ នៅអំឡុងពេលដែលប្រជារាស្រ្តអ៊ីស្រាអែលនៅជាប់ជាឈ្លើយ ហើយបានវិលត្រឡប់មកវិញ នោះស្មៀនគាត់បានរៀនទុកចិត្ត និងដាក់សេចក្ដីសង្ឃឹមរបស់គាត់នៅលើព្រះ ជាជាងដាក់ទំនុកចិត្តនៅលើមនុស្ស។ ប្រជារាស្រ្តអ៊ីស្រាអែលមានបុព្វហេតុមួយដ៏ពិសេស ដើម្បីសរសើរតម្កើងព្រះអម្ចាស់។ គ្មានជាតិសាសន៍ដទៃណាផ្សេង ដែលទទួលបានការបើកសម្ដែងពីព្រះប្រាជ្ញាញាណ និងពីរូបអង្គរបស់ព្រះ តាមរយៈក្រឹត្យវិន័យ ហើយនិងបទបញ្ញត្តិរបស់ព្រះអង្គនោះទេ។ នេះពិតជារឿងសក្តិសមណាស់ ក្នុងការលើកសរសើរតម្កើងដល់ព្រះ។

តើខ្ញុំត្រូវឆ្លើយតបយ៉ាងណា?

តើអ្នកកំពុងមានវិបត្តិបញ្ហាណាខ្លះ ដែលអ្នកកំពុងតែប្រឈមនាពេលឥឡូវនេះ? តើនឹងមាននរណាដែលអ្នកទុកចិត្ត សម្រាប់ឆ្លើយតបចំពោះវិបត្តិអស់ទាំងនោះ? អ្នកអាចទុកចិត្តព្រះ ដ្បិតព្រះទ្រង់នឹងប្រទានឱ្យទៅដល់រាល់តម្រូវការរបស់អ្នក នៅពេលដែលអ្នកចំណាយពេលនៅក្នុងព្រះបន្ទូលរបស់ព្រះអង្គ ហើយនិងនៅក្នុងការអធិស្ឋាន។ ប្រសិនបើអ្នកព្រួយបារម្ភ អ្នកអាចបែរទៅរកព្រះអង្គសម្រាប់សេចក្ដីសុខសាន្ត។ ប្រសិនបើអ្នកនៅឯកោ នោះអ្នកអាចបែរទៅរកព្រះអង្គ សម្រាប់មិត្តភាព។ ប្រសិនបើដួងចិត្តរបស់អ្នកខ្ទេចខ្ទាំ នោះអ្នកអាចបែរទៅរកព្រះអង្គសម្រាប់ការព្យាបាល។ ប្រសិនបើអ្នកមានអារម្មណ៍ថាមិនអាចធ្វើអ្វីបាន នោះអ្នកអាចបែរទៅរកព្រះអង្គសម្រាប់កម្លាំង។ អ្នកអាចអរព្រះគុណព្រះ ហើយសរសើរតម្កើងព្រះអង្គ មុននឹងអ្នកទទួលបានការឆ្លើយតបទៅទៀត។ នេះគឺដោយសារតែព្រះជាម្ចាស់ ទ្រង់តែងតែស្មោះត្រង់ជារៀងរហូត ទៅកាន់អស់អ្នកដែលជ្រើសរើសដាក់ក្ដីសង្ឃឹមរបស់ខ្លួននៅក្នុងព្រះអង្គ។