Reis Saam Met Jesus — 40 Dae Lydenstyd OordenkingVoorbeeld

Die omvang van Jesus se kruisiging is in die natuur waargeneem. Duisternis het oor die aarde gekom. Die aarde het geskud, en die rotse het uitmekaar gebars.

Dit was onmoontlik vir iemand wat dit aanskou het om dit as toeval te beskou. Die natuur het die aakligheid van die oomblik weerspieël.

Die offisiere en soldate het baie bang geword en uiteindelik erken dat Jesus die Seun van God was.

Dit is egter twee totaal en al verskillende goed om die feit te erken en om jou geloof in Jesus te plaas. Die feit is dat die Satan ook erken dat Jesus die Seun van God is. Wat jy met daardie kennis doen bepaal jou lewe hier en vir ewig.

Die natuur getuig van die glorieryke krag van God. In Romeine 1: 20 skryf Paulus: "Van die skepping van die wêreld af kan 'n mens uit die werke van God duidelik aflei dat sy krag ewigdurend is en dat Hy waarlik God is, hoewel dit dinge is wat 'n mens nie met die oog kan sien nie. Vir hierdie mense is daar dus geen verontskuldiging nie."

Laat ons nie ophou om uit te roep: "Hierdie man was werklik die Seun van God" nie. Kom ons sê met vreugde dat Hy my God is. 

Oordink

Wat doen ek met my kennis van God? Verander dit die manier hoe ek lewe? 

Gebed

Genadige God, soms word ek vasgevang in feitlike kennis. Dit sink nie in my hart in nie. Ek laat nie toe dat u waarheid my verander nie. Vergewe my as ek gevoelloos en onverskillig teenoor u Woord staan. Amen.