Reis Saam Met Jesus — 40 Dae Lydenstyd OordenkingVoorbeeld

Wat 'n dramatiese oomblik. Die voorhangsel van die tempel het van bo tot onder middeldeur geskeur.

Die voorhangsel, wat die heiligdom van die aanbidders geskei het, was 'n swaar stuk materiaal. Volgens geskiedkundige verslae, was dit 14 tot 18 meter lank en omtrent 10 sentimeter dik. Dit was nie 'n dun strook lap nie. En dit het van bo tot onder geskeur. 

Hierdie skeuring van die voorhangsel was bonatuurlik en het verwys na die feit dat Jesus se dood vir ons — 'n gebroke en sondige mensdom — die reg gee om in die heiligdom in te gaan en 'n verhouding met God te hê.

Dalk moet ons onsself vra agter watter soort gordyne of sluiers ons wegkruip. Wat weerhou ons daarvan om 'n intieme gesprek met God aan te gaan?

Is my verlede dalk te duister? Of moet ek eers my lewe in orde kry? Kan die gordyn dalk wees dat ek nog vreugde in aardse dinge vind? 

Ons moet glo dat die gordyn alreeds geskeur het. Hebreërs 10:19-20 sê: "Broers, ons het dus nou deur die bloed van Jesus vrye toegang tot die heiligdom, en dit op 'n weg wat nuut is en na die lewe lei. Hierdie weg het Hy vir ons gebaan deur die voorhangsel heen, dit is deur sy liggaam." 

Jesus se liggaam is geskeur sodat almal in die heiligdom kon gaan.

Solank as wat ons die gordyn toegetrek hou, sal ons nooit die goedheid van die Here beleef nie.

Oordink

Wat weerhou my daarvan om in die heiligdom in te gaan? Agter watter gordyn kruip ek weg? Nader ek die troon van genade met selfvertroue?

Gebed

Hemelse Vader, dankie dat U die wêreld so lief gehad het, dat U u enigste Seun gegee het. Dankie dat Hy die voorhangsel geword het wat geskeur is, sodat ons in die heiligdom kan gaan. Amen.