Blywende Hoopគំរូ

Onvervulde Hoop

Lees: Spreuke 13:12

SOAP: Spreuke 13:12

'n Verwagting wat nie uitkom nie, maak 'n mens mismoedig; 'n begeerte wat vervul word, bring nuwe lewe.

Oordenking

Hierdie vers oor hoop is beskrywend, nie voorskriftelik nie. Dit beskryf wat gebeur wanneer ons hoop het – begeerte gepaard met die verwagting van iets goeds – en hoe ons reageer wanneer ons hoop nie vervul word nie of wanneer dit vervul word.

Wanneer ons hoop nie vervul word nie, ervaar ons pyn. Ons harte kan siek voel. Ons kan fisieke sowel as emosionele pyn ervaar. Ons wêreld kan verpletter voel. Ons geloof in God se goedheid kan wankel. Ons kan met ‘n magdom onbeantwoorde vrae sit.

Wanneer ons hoop nie vervul word nie, wanneer dit wat ons begeer of verlang of op staatgemaak het, nie realiseer nie, maak dit inderdaad ons harte siek. Dit beteken egter nie dat ons verkeerd was om te hoop nie. Ons begeerte na iets goeds, ons hoop op genesing, herstel of voorsiening, is goed en normaal. Wanneer ons verwagtinge nie realiseer nie, moet ons onsself toelaat om daardie emosies te voel en eerlik met God te wees oor waar ons ons bevind. Net omdat dit miskien kan gebeur, beteken egter nie ons moet nooit hoop nie.

Wanneer ons hoop vervul word, ervaar ons vreugde en lewe! Wanneer die goeie dinge wat ons verwag het waar word, kan ons oorloop van lewe en vrede. Ons wêreld kan verander. Ons geloof in God se goedheid kan versterk word. Ons kan uiteindelik die antwoorde op baie van ons vrae sien.

Die verlangens wat God op hierdie aarde vir ons vervul, is bedoel om ons te herinner aan die uiteindelike vervulling van al ons begeertes. In Christus word al ons hoop vervul, aan al ons begeertes voldoen en word al die goeie dinge wat ons verwag, bewaarheid. Wanneer God ons hoop vervul, wys dit vooruit na die belofte van Christus se wederkoms. Dit herinner ons dat Hy goed is en dat Hy ons eendag van alle swaarkry gaan verlos.

Hoop, ongeag die resultaat, is ‘n gawe van God wat bedoel is om ons vooruit na Christus te wys. Wanneer ons hoop nie vervul word nie, kan ons vashou aan die hoop wat ons in Christus het, die een hoop wat nooit teleurgestel sal word nie. Wanneer ons begeerte vervul word, kan ons verheug wees en uitsien na die uiteindelike vervulling van ons hoop wat met Christus se wederkoms aan die kom is. Moenie moed opgee nie! Wat die uitkoms ook al mag wees, God is steeds dieselfde.