Trapklippe Na ShalomVoorbeeld

Vind Vrede in die Woord van God 

'n Paar jaar gelede het 'n kunsgalery 'n kompetisie gehou vir 'n skildery wat die beste uitdrukking van die idee van vrede uitbeeld. Daar was baie waardige voorleggings — 'n manjifieke skildery van 'n sonsondergang oor die kalm see van 'n ongerepte strand; 'n ander wat die groen weivelde oor golwende heuwels en 'n kalm meer uitbeeld. Nog 'n ander voorlegging was 'n pragtige landskap waar sneeu pas oor die berge geval het met 'n klein houthuisie waarin die lig van 'n warm vuurtjie gloei. 

Tog het nie een van hierdie vrede-geïnspireerde tonele die prys gewen nie. Die mees onwaarskynlike mededinger het die eerste prys gewen. Dit was 'n skildery wat 'n storm uitgebeeld het met flitsende weerlig en winde wat deur die bome van 'n rotsagtige krans gewaai het. Wanneer jy egter van naderby kyk, kon jy sien hoekom hierdie skildery gewen het. In 'n skeur van die rots was 'n moederarend wat haar vlerke oor haar ses slapende kuikens uitgesprei het. Dit was die wese van vrede.

Vriende, soos ons voorheen bespreek het, is vrede nie die afwesigheid van storms in ons lewens nie. Daar sal altyd storms wees wat kom en gaan. Vrede is die vermoë om kalm te bly deur die storms terwyl ons onder die vlerke van die Here skuil.

'n Ander goeie uitbeelding van hierdie idee sou 'n skildery van Noag in die ark wees, waar dit op die waters van die vloed dryf soos in Genesis 7 beskryf word. Oral om Noag woed die waters. Dood en verwoesting het om hulle plaasgevind, maar Noag en sy gesin was veilig aan boord, binne die sekuriteit in die skuiling van die ark. Heel toepaslik beteken die naam Noag "gemak" en ook "rus". Noag kon rustig wees gedurende die storm omdat hy aan God gehoorsaam was.

Dit is 'n baie goeie uitbeelding van hoe ons die storms in ons eie lewens kan weerstaan. Daar kan groot onrus om ons wees. Die ekonomie kan in duie stort, met oorlog op die horison, moeilikheid by die werk, 'n slegte mediese uitslag. Tog, deur alles heen, kan ons veilig in ons ark rus en oor alles dryf en dis hoe:

Die Hebreeuse woord vir ark is tevah, maar tevah kan ook "woord" beteken. Volgens hierdie definisie, kan ons dus sê dat Noag in die "woord" rus gevind het en net so kan ons in die Woord van God rus vind. Wanneer die storm om ons woed, kan ons ons toevlug in die woorde van ons God vind. 

Oordink sommige van die woorde wat God vir ons sê: "Wees stil en weet Ek is God!" (Psalm 46:11 NLV). Hy verklaar: "Moenie bang wees nie, Ek is by jou, moenie bekommerd wees nie, Ek is jou God" (Jesaja 41:10). Hy belowe: "Hy sal jou oordek met sy vlerke, en onder sy vleuels sal jy skuil" (Psalm 91:4 NLV). 

Ons kan altyd in die Woord van God vrede vind, en daarmee enige storm weerstaan wat in ons rigting kom.

Trapklip 3: Vind vrede in die Woord van God. Wanneer dit voel of die lewe jou uitdaag en toets, reik na jou Bybel en neem jou toevlug in die Woord van God. Laat die Skrif toe om jou siel te kalmeer en sy onderrig om aan jou vrede te gee. Soos die wyse koning Salomo in Spreuke 3:17 oor die Woord van God geskryf het: "Wysheid [die Bybel] maak ’n mens gelukkig. Wie dit volg, beleef vrede."