Trapklippe Na ShalomVoorbeeld

Vestig Vrede in Jou Huis

Hollywood het die perke regtig hoog gestel toe dit met "vir ewig en altyd gelukkig saam" te voorskyn gekom het. Ons word met onrealistiese verwagtinge groot oor wat die huwelik is en hoe dít wat volg behoort te wees. Selfs al besef ons dat dit 'n valse realiteit is, is dit steeds 'n idee wat ons harte aangryp. Die waarheid is egter, ons huweliksmaats en kinders sal nie altyd perfek wees nie. Ook ons sal nie altyd perfek wees nie. Niemand is nie. 

Alhoewel "vir ewig en altyd gelukkig saam" 'n mite is, beteken dit nie dat ons nie shalom in ons huise kan hê nie. Dit is noodsaaklik, maar ons moet bereid wees om daarvoor te werk.

Aäron, die eerste hoëpriester van Israel, was net ondergeskik aan Moses, die een met die hoogste outoriteit onder die Israeliete. Tog is Aäron toegelaat om dinge te doen wat selfs Moses nie kon nie. As die hoëpriester was hy die enigste wat in die allerheiligste kon ingaan en sekere rituele uitvoer wat niemand anders toegelaat is nie. 

Waarmee was hierdie baie heilige man daagliks besig? In plaas daarvan om oor die mense te regeer, was hy onder hulle besig om vrede te bewerkstellig.

Meer as enige ander mans en vroue in die Bybel, was Aäron bekend vir sy vermoëns om vrede te bewerkstellig. Hy het gedurig tussen mans en hul vrouens gewerk om vrede in sukkelende verhoudings te herstel. Trouens, baie kinders is gedurende Aäron se leeftyd na hom vernoem omdat dit weens sy pogings was dat hulle die lewe ingekom het!

Aäron het verstaan dat vrede, veral in die huis, van die uiterste belang was en dit was dus die heilige werk waarmee hy gekies het om hom besig te hou.

Ons onderskat dikwels die belangrikheid van vrede in ons huise, met ons familie en vriende. Ons dink ons kan daarsonder klaarkom. Tog, soos Aäron verstaan het, is dit slegs wanneer ons vrede in ons huise het dat ons enigsins kan hoop om vrede in onsself en in ons wêreld te hê. 

Kinders volg die voorbeeld wat hulle sien. As hulle dus vrede in die huis sien, is hulle baie meer geneig om ander met dieselfde vriendelikheid, vergifnis en respek te behandel, volgens die voorbeeld wat vir hulle gestel is. Bowenal, as ons nie ons verskille kan oorkom met diegene vir wie ons lief is nie, hoe kan ons ooit verwag om dit te oorkom met hulle met wie ons geen verbintenis het nie? Ons huise kan 'n bron van vrede in die wêreld wees of, mag dit nie so wees nie, bydra tot die gebrek aan harmonie wat vandag so algemeen in ons wêreld voorkom. 

Wanneer ons boonop die volle betekenis van shalom verstaan, kan ons na waarde skat dat wanneer daar shalom in die huis is, is gesinslede nie net verdraagsaam nie, maar hulle word waardeer. Die fokus skuif dan na die goeie in elke persoon en hoe hy of sy tot die gesin bydra, eerder as wat daar tekort skiet. Dit geld ook in ons verhoudings met vriende en selfs met vreemdelinge. 

Uiteindelik, wanneer ons op die goeie in ander fokus, sal ons ook die goeie in hulle na vore bring — en dit is iets waaruit ons almal voordeel kan trek.

Trapklip 5: Bring shalom na jou huis toe. Dink aan elkeen wat die naaste aan jou is — of dit 'n gesinslid is saam met wie jy woon of iemand wat saam met jou werk, of met wie jy die meeste kontak het. Wat waardeer jy die meeste van daardie persoon? Fokus op wat goed in die persoon is, en sê dit vir hom of haar! Bied aan almal dankbaarheid, respek, vergifnis en vriendelikheid. Al is dit nie altyd so maklik om 'n vreedsame huis te skep nie, moet jy nooit ophou probeer nie.