Mendime MëngjesiShembull

7 Janar

Le të falënderojmë Perëndinë për dhuratën e Tij të papërshkrueshme.

2 e Korintasve 9:15

Vetë Shlyerja i përjashton të gjitha idetë e meritës njerëzore dhe, nga vetë natyra e saj, shpall se është falas. Konsideroni madhështinë e Shlyerjes, meditoni mbi çmimin e saj: Hyji u mishërua; bindja e përsosur, pastërtia e panjollë, hiri dhe dashuria e pashoqe, vuajtjet e mëdha e të mistershme, vdekja e mahnitshme, ringjallja, ngjitja dhe ndërmjetësimi i Shpëtimtarit, të gjitha së bashku e bënë këtë flijimin më të jashtëzakonshëm që mund të ofrohej ndonjëherë. A do të ketë ndonjë gjë te mëkatari që ta meritojë këtë flijim? A do ta ulë Perëndia aq shumë dinjitetin e Tij, ta nënvlerësojë vlerën e Tij dhe ta çnderojë Veten sa të bëjë ndonjë lloj "shkëmbimi" me mëkatarin? Edhe sikur Perëndia të ishte i prirur ta bënte këtë, çfarë mund të ketë brenda mëkatarit për ta blerë këtë gjë? Ku është e barasvlershmja? Ku është çmimi? "Mjerë!" është klithma e shpirtit të bindur, "unë jam i falimentuar në frymë; e humba gjithçka kur prindi im i parë u rrëzua; erdha në këtë botë i varfër e pa ndihmë; mëkatit të natyrës time i kam shtuar edhe shkeljet reale të një karakteri të prishur. Nuk kam asgjë që të më bëjë të pranueshëm para Perëndisë; nuk kam asnjë të drejtë për mëshirën e Tij; nuk kam asnjë çmim me të cilin të mund ta blej; e, nëse shpengimi nuk është falas, pa para e pa ndonjë çmim, atëherë jam krejt i humbur." Prandaj, vetë fakti që Shlyerja është kaq e shtrenjtë, e bën të jetë përtej çdo çmimi dhe i vendos etiketën e pafundme falas.