Mendime MëngjesiShembull

11 Janar

Sepse ne nuk kemi një kryeprift që nuk mund të vuajë bashkë me dobësitë tona, por që u tundua në të gjitha njësoj si ne, por pa mëkat.

Hebrenjve 4:15

Shikoni Atë ndërsa mbart brengat dhe sëmundjet tona; shumë më tepër se kaq, shiheni teksa mbart mëkatet dhe paudhësitë tona. Mos mendoni se shtegu juaj është i izoluar. Perëndia i mishëruar e ka shkelur atë shteg para jush dhe Ai mund t’ju japë sytë e qartë të besimit për të dalluar gjurmët e Tij në çdo hap. Jezusi mund të thotë, dhe në fakt ju thotë: “E njoh pikëllimin tënd, e di se çfarë kryqi po mbart, sepse e kam mbartur Vetë. Nuk po mban mbi shpinë një barrë që Unë nuk e kam mbajtur, nuk po përjeton asnjë pikëllim që Unë të mos e kem ndjerë dhe asnjë dhimbje që Unë të mos e kem duruar, nuk po ecën në një shteg që Unë të mos e kem shkelur, nuk po derdh asnjë lot që mos ketë njomur edhe sytë e Mi, nuk ka asnjë re mbi shpirtin tënd që të mos ketë qenë edhe mbi shpirtin tim. Mos është dobësia e trupit? Një herë Unë eca për 65 kilometra për t’ia çuar ujin e gjallë një mëkatareje të mjerë në Samari. Mos është pikëllimi i humbjes? Unë qava pranë varrit të mikut tim, edhe pse e dija se isha gati ta ktheja sërish në jetë atë person të dashur. Mos është dobësia dhe brishtësia e miqësive njerëzore? Unë isha atje dhe dëgjova me veshët e Mi që u mohova nga të njëjtat buzë që dikur më kishin folur me aq dashuri; buzët që tani po më mohonin me betim, dikur shqiptuan se do më donin deri në vdekje. Mos është vështirësia e rrethanave, apo ndjesia poshtëruese e varësisë? Unë nuk isha i huaj me varfërinë dhe shpesh u mbështeta e u ushqeva nga bamirësia e të tjerëve. Mos vallë je i pastrehë e pa miq? Kështu isha edhe Unë. “Dhelprat kanë strofkat e tyre dhe zogjtë kanë foletë e tyre”, por Unë, edhe pse isha Zoti i të gjithave, nuk kisha ku të mbështesja kokën; shpesh, ditë pas dite, nuk dëgjoja ndonjë fjalë qetësuese miqësie me veshët e Mi. Mos është barra e mëkatit? Edhe atë e mbarta në gjithë peshën e saj të jashtëzakonshme dhe të grumbulluar kur u vara i mallkuar mbi atë dru.”