Mendime MëngjesiShembull

12 Janar

Sepse pranë Teje është burimi i jetës.

Psalmi 36:9

Shihni ç’burim jete është Perëndia! Gjithë gjallesat, nga engjëlli më i lartë e deri tek krijesa më e ulët e tokës, e marrin frymën e ekzistencës së tyre prej Tij. “Në Të ne jetojmë, lëvizim dhe kemi qenien tonë.” Por Ai është më tepër se kaq për Kishën. Ai është burimi i dashurisë, sikurse është edhe burimi i jetës. Frymët e “të drejtëve që u bënë të përsosur” dhe të shpenguarit e dheut e kënaqin shpirtin e tyre të etur në plotësinë e tejmbushur të dashurisë së Atit. Sa nevojë kemi për këtë të vërtetë! Çfarë pikëpamjesh të kufizuara, konceptimesh të padrejta dhe interpretimesh të gabuara kemi ruajtur për Të, thjesht sepse e kemi anashkaluar karakterin e Tij si Burimi i ujërave të gjalla! Ne e “kufizojmë të Shenjtin e Izraelit”. E gjykojmë atë përmes konceptimeve tona të dobëta rreth gjërave. Mendojmë se Ai është si ne. Në përqasjen tonë, harrojmë që po shkojmë te një Burim i Pafundmë. Harrojmë se, sa më e madhe të jetë kërkesa që i çojmë Perëndisë, aq më tepër do të marrim dhe se, sa më shpesh të shkojmë tek Ai, aq më shpesh do të mirëpritemi. Harrojmë se nuk mund të kërkojmë kurrë më tepër se duhet. Fakti që kërkojmë kaq pak është mëkat nga ana jonë dhe çnderim për Të. Harrojmë që Ai përlëvdohet në dhënie dhe se, sa më tepër hir derdh mbi popullin e Tij, aq më i pasur do të jetë lavdërimi që Ai do të marrë. Sa e denjë është “dhurata e Tij e patregueshme” për këtë Burim të Pafundmë dashurie dhe hiri. Kjo dhuratë erdhi nga një zemër e madhe, dhe ajo zemër që dha Jezusin nuk do t’u privojë asgjë të mirë atyre që ecin me drejtësi.