Mendime MëngjesiShembull

5 Janar

Ai, që beson në Birin e Perëndisë ka këtë dëshmi në vetvete.

1 e Gjonit 5:10

Fryma e Perëndisë e thyen, e përul dhe e shëron zemrën; e merr të vërtetën e Vet dhe e shkruan në shpirt; dëshmon, vulos, shenjtëron; i hap sytë e shpirtit ndaj shenjtërisë së ligjit të Perëndisë - për fajin e tij moral, për varfërinë, pafuqinë dhe nevojën e thellë për gjakun dhe drejtësinë e Krishtit dhe, në këtë mënyrë, e udhëheq të prehet tek Ai si një Shpëtimtar i gjithë-mjaftueshëm; kështu prodhon “drejtësi, paqe dhe gëzim në Frymën e Shenjtë”; kjo është e vërteta e përjetuar, kjo është feja e zemrës; çdo fe tjetër, edhe pse në teori mund të jetë e bukur, edhe pse mund të jetë e vërtetë në doktrinë, nuk vlen asgjë! Pa këtë përjetim, nuk ekziston besim i vërtetë në Fjalën e Perëndisë. Zbulesa e Perëndisë nuk kërkon besim që thjesht miraton kredencialet e saj hyjnore; nuk kërkon thjesht që skepticizmi t’i lërë mënjanë dyshimet e veta dhe ta pranojë si një të vërtetë hyjnore; ajo kërkon, me këmbëngulje, besim që i pranon plotësisht, pa dyshim dhe praktikisht faktet e jashtëzakonshme dhe shumë të mëdha që kjo e vërtetë shpall; një besim që i kupton ato me fuqi reale në shpirt dhe e identifikon të vërtetën me këto fakte; një besim që beson se ekziston një ferr dhe përpiqet t’i shpëtojë; një besim që beson se ekziston një qiell dhe përpiqet të hyjë në të; një besim që e pranon doktrinën e rrënimit të njeriut prej natyrës së vet dhe që përqafon doktrinën e përtëritjes së njeriut përmes hirit; me pak fjalë, një besim që hedh poshtë çdo mbështetje te njeriu dhe pranon si të vetmen strehë “drejtësinë e Krishtit për të gjithë e mbi të gjithë ata që besojnë.” Ky është besimi i vërtetë i ungjillit! Lexues, a e ke këtë besim?