Mendime MëngjesiShembull

4 Janar

Hiri i Zotit Jezus Krisht, dashuria e Perëndisë dhe bashkësia e Frymës së Shenjtë qofshim me ju të gjithë. Amen.

2 e Korintasve 13:13

Doktrina e Trinisë është çelësi i Biblës për të krishterin. Fryma e Shenjtë jep zotësi dhe fuqi për ta përdorur dhe, kur përdoret, ky çelës zbërthen një sërë misteresh hyjnore, hap çdo derë në shenjtëroren e bekuar të së vërtetës. Por, nën dritën e shpëtimit, kjo hijeshi dhe bukuri shfaqet në mënyrën më të veçantë: shpëtim në të cilin Jahveu shfaqet aq shumë i lavdishëm në mënyrë të pashoqe - saktësisht Vetja e Tij. Dashuria e Atit shfaqet në “dërgimin” e Birit të Tij; dashuria e Birit shfaqet në “marrjen përsipër” të veprës së shpëtimit; dashuria e Frymës së Shenjtë në “zbatimin” e kësaj vepre. Sa e kënaqshme është të shohësh sesi, në zgjidhjen e problemit të madh të shpengimit të njeriut, Treshja Hyjnore u përfshi në mënyrë kaq të thellë. Për cilën prej këtyre nuk do të kishim nevojë? Që të gjitha ishin të nevojshme dhe, po të na mungonte njëra, shpëtimi ynë nuk do kishte qenë i plotë; do të kishim qenë përjetësisht të humbur. Duke e sjellë në lavdi kishën, të cilën e kanë shpëtuar në këtë mënyrë, Ati, Biri dhe Fryma e Shenjtë kanë bërë një betim solemn. “Sepse përmes Tij që të dy kemi hyrje tek Ati nëpërmjet një Fryme të vetëm.”