Mendime MëngjesiShembull

13 Shkurt

Era fryn ku të dojë dhe ti ia dëgjon zërin, por ti nuk e di nga vjen dhe ku po shkon; kështu është edhe çdo njeri që është lindur nga Fryma.

Gjoni 3:8

Vini re sa e goditur është kjo figurë. Era nuk i nënshtrohet fuqisë qeverisëse të njeriut. Ajo është po aq sovrane në ndikimin e saj sa edhe e parezistueshme në forcën e saj. Nuk mund ta urdhërojmë, as ta kontrollojmë. Është jashtë fuqisë tonë ta thërrasim, sikurse është jashtë fuqisë tonë ta qetësojmë. Ajo vjen dhe ne nuk e dimë se nga; ajo shkon dhe ne nuk e dimë se ku. “Kështu është edhe me këdo që ka lindur prej Frymës.” Nuk themi që Frymës nuk i rezistohet; Atij i bëhet rezistencë, e fuqishme dhe këmbëngulëse. Por Atë nuk mund ta mposhtësh. Gjithë sa kanë armiku dhe natyra e mishtë e zemrës ngrihen si kundërshtim i drejtpërdrejtë ndaj Tij; por, kur Ai është i fiksuar pas misionit të dashurisë, kur, në përputhje me qëllimin e përjetshëm, Ai vjen që të shpëtojë, të gjitha pushtetet e tokës e të ferrit bashkë nuk mund t’i rezistojnë Atij në mënyrë të efektshme. Duke qenë forca e pushtetshme, Ai rrëzon çdo kundërshtim, hedh tej çdo pengesë, për të mposhtur çdo vështirësi, për ta bërë mëkatarin “të gatshëm në ditën e pushtetit të Tij” e për ta sjellë tek këmbët e Jezusit dhe, atje, të ulet me mirënjohje dhe zemërbutësi, “i veshur dhe me mendje në vend”. Kush mund t’i bëjë ballë fuqisë së Frymës? Nëse ai flet me “zërin e vogël dhe të butë”, me dashurinë e butë, apo nëse vjen me “erën e fortë dhe të furishme” të bindjes së thellë dhe pushtuese, ndikimi i Tij është i pathyeshëm, fuqia e Tij është e parezistueshme. Ai punon në mënyrë të efektshme tek ata që besojnë. Por veprimtaria e tij është po aq sovrane sa edhe e pushtetshme. Ai vjen ku të dëshirojë; Ai vjen kur të dëshirojë; Ai vjen si të dëshirojë. Ai fryn ku dëshiron; ne dëgjojmë tingullin, shohim efektet, por mënyrën si Ai punon, pse punon dhe pse zgjedh të punojë në një mënyrë të caktuar, këtë nuk ua zbulon vdekatarëve. E drejtë, o Frymë i bekuar dhe i përjetshëm, sepse kështu t’u duk mirë.