Mendime MëngjesiShembull

11 Shkurt

Kushdo, që bën drejtësinë, ka lindur prej Tij.

1 e Gjonit 2:29

Shenjtëria negative - heqja dorë nga mëkatet e jashtme - nuk e përshkruan gjithmonë shpirtin e rilindur; por, e lidhur me këtë, duhet të jetë edhe prova pozitive: “Kushdo që praktikon drejtësinë ka lindur prej Tij”. Atje ku ka jetë ka veprim, ka lëvizje, ka energji. Jeta e njeriut të rilindur është jetë me veprimtarinë më të lartë. Parimet që e ndikojnë atë janë hyjnore dhe qiellore; prirja e tyre është drejt veprimtarisë së shenjtë. Sa më tepër t’i përngjajmë Krishtit “në drejtësi dhe shenjtëri të vërtetë”, aq më e fortë do të jetë prova për ne dhe për të tjerët se kemi lindur sërish. Nëse nuk e kemi mashtruar veten, ne zotërojmë vetë jetën e Krishtit. Ajo jetë është e shenjtë në prirjen e saj dhe e zellshme në veprimtarinë e vet. Shpirti i përtërirë ka ëndje për shenjtëri. Ai digjet për ngjashmërinë hyjnore. Ai nuk mbështetet thjesht tek dëshira; ai çohet dhe mundohet për bekimin; ai “e vepron shpëtimin e vet me frikë dhe dridhje”. Ai i përdor me lutje e zell mjetet që Zoti i shenjtërimit i ka dhënë për të arritur shenjtërinë; ai është aktiv në kërkimin e tij për këtë bekim.