Mendime MëngjesiShembull

6 Shkurt

Nëse një nuk lind përsëri, ai nuk mund ta shohë mbretërinë e Perëndisë.

Gjoni 3:3

Rilindja është një vepër unike dhe e dallueshme prej gjithë veprave të tjera të Frymës Hyjnore. Ajo duhet të dallohet me kujdes nga konvertimi, birësimi, drejtësimi dhe shenjtërimi; megjithatë, duhet të konsiderohet si ajo çka formon bazat dhe fillesat e gjithë këtyre. Për shembull, nuk mund të ketë konvertim pa një parim jete në shpirt; kjo për shkak se konvertimi është ushtrimi i fuqisë frymore që është vendosur brenda njeriut. Nuk mund të ketë ndjesi birësimi veçmas natyrës së përtërirë; kjo për shkak se birësimi përcjell vetëm privilegjet, jo natyrën e bijve. Nuk mund të ketë asnjë ndjesi ngushëlluese për pranimin në të Dashurin, nëse mendja nuk kalon më parë nga vdekja në jetë; as mund të ketë qoftë edhe një hap të vogël në përshtatje me vullnetin dhe dëshirat e shëmbëlltyrës së Perëndisë sa kohë që në shpirt nuk gjendet vetë rrënja e shenjtërisë. Besimi është hir pastrues, por ai gjendet në zemrën “që është rikrijuar në Krishtin Jezus”. Prandaj, është e domosdoshme që të ndodhë përtëritja frymore e të gjithë personit, para se shpirti të mund të kalojë në gjendje birësimi, drejtësimi dhe shenjtërimi. Lexues, medito seriozisht mbi këtë të vërtetë solemne.