Mendime MëngjesiShembull

28 Janar

I Cili u dorëzua për shkak të shkeljeve tona dhe u ringjall për drejtësimin tonë.

Romakëve 4:25

Ai u bind, vuajti, u ringjall si Përfaqësuesi, Garantuesi, Kreu i kishës së Tij; mos thënshim kurrë se çka Ai bëri nuk ishte aq shumë veprimi i Kishës në Të sa ishte veprimi i Tij. Ai nuk u bind për Veten, nuk vdiq dhe u ringjall për Veten, por për “Kishën, trupin e Tij”. Prandaj, ringjallja e Tij ishte po aq çlirim dhe përligjje për gjithë Kishës së Tij sa ishte edhe për Atë vetë. Atëherë u dha vendimi i lavdishëm i shlyerjes, atëherë ndodhi vepra madhështore e drejtësimit. Dalja e Shpenguesit prej varrit ishte dalja e të shpenguarve nga çdo dënim. Çlirimi i Tij nga kthetrat e ftohta të shkatërruesit ishte çlirimi i tyre nga dora e hekurt e ligjit. “Ai u nxor nga burgu dhe nga gjykimi” dhe, ndërsa dilte nga gjykata e drejtësisë së Perëndisë dhe nga burgu i vdekjes, Kisha e blerë me gjakun e Tij doli bashkë me Të, ligjërisht dhe plotësisht e shfajësuar; dhe, ndërsa u rrëzua edhe pengesa e fundit dhe u këput pranga e fundit, klithi: “Kush është ai që do t'i dënojë? Krishti është ai që vdiq, po për më tepër ai u ringjall.”. Shpengimtar i çmuar! Çfarë lavdie e pashoqe që rrezatohet prej varrit Tënd bosh!