Mendime MëngjesiShembull

26 Janar

Ditët e mia janë në dorën Tënde.

Psalmi 31:15

Lëre këtë të vërtetë të çmuar t’jua çlirojë mendjen nga çdo shqetësim dhe ankth i panevojshëm për të tashmen apo të ardhmen. Ushtro besim të thjeshtë në Perëndinë, “Mos u shqetësoni për asgjë.” Mëso të jesh i kënaqur me fatin tënd të tanishëm, me mënyrën sesi po të trajton Perëndia. Je saktësisht aty ku të ka vendosur provania e Tij me vendimin e saj të pashkatërrueshëm e megjithatë plotësisht të urtë dhe të drejtë. Mund të jetë një pozitë e dhimbshme, e lodhshme, sprovuese, ama është e drejtë. Po, është e drejtë. Thjesht syno që ta përlëvdosh Atë në këtë pozitë. Kudo që të jesh vendosur, Perëndia ka një punë që duhet ta bësh ti, një qëllim që duhet plotësuar prej teje e ku Ai ndërthur lumturinë tënde me lavdinë e Tij. Kur t’i kesh përvetësuar mësimet e dashurisë së Tij, Ai do të të transferojë në një sferë më të gjerë, për detyrat më fisnike dhe përgjegjësitë më të larta të së cilës e tashmja ndoshta po të disiplinon e po të përgatit. Prandaj, dëshiro të jetosh një jetë varësie të përditshme te Perëndia. Kjo është një jetë e ëmbël dhe e shenjtë! Të shpëton nga shumë ndjenja dëshpëruese, nga shumë shqetësime gërryese, nga shumë mendime ankthi, nga shumë net pa gjumë, nga shumë sy të përlotur dhe nga shumë skema mëkatare e pa mend. Duke u mbështetur te “besëlidhja e përjetshme që parashikon çdo gjë dhe që është e sigurt”, mund t’ia besosh kujdesit të Zotit fëmijët, miqtë, thirrjen dhe veten, me sigurinë më të plotë se të gjitha ‘ditët’ e tyre dhe të tuat janë në duart e Tij.