Mendime MëngjesiShembull

23 Janar

Krishti do të madhërohet në trupin tim, qoftë me anë të jetës qoftë me anë të vdekjes.

Filipianëve1:20

Nuk do t’ju mungojë Krishti kur të keni më tepër nevojë për Të. Ai që ka qenë me ju përgjatë gjithë pelegrinazhit tuaj tokësor ka për të qenë me ju deri në hapin tuaj të fundit. Bariu që ju ka drejtuar përgjatë shkretëtirës nuk ka për t’ju lënë në momentin kur sapo jeni duke dalë prej saj dhe po hyni në tokën e premtuar. Timonieri që ju ka drejtuar përgjatë stuhive nuk ka për t’u larguar nga timoni në çastin kur anija juaj po hyn në limanin e prehjes. Kapiteni që ka ngadhënjyer për ju e në ju nuk ka për t’ju braktisur në prag të konfliktit dhe fitores së sigurt. Oh, jo! Jezusi ka për të qenë me ju deri në fund. Mos t’ju kapë aspak ankthi për çastin e vdekjes. Le të jetë shqetësimi juaj sesi mund ta përlëvdoni më mirë Atë në jetën tuaj; Ai do ta përlëvdojë Veten në vdekjen tuaj. Gjithë hiri, gjithë forca, gjithë lavdia është ruajtur për ju për atë çast. Kur ai çast të vijë, jo më parë, Jezusi ka për të hapur thesarin e Tij dhe do ta derdhë mbi ju. Por, oh, jetoni për Të! Të jeni në gjendje të thuash: “Sepse për mua të jetuarit është Krishti.”. Përpiquni për këtë. Çfarëdo gjëje që e kundërshton këtë, vendoseni para hirit të Tij, vendoseni poshtë, po, lidheni pas kryqit të Tij. Lëreni Krishtin të jetë gjithçka për ju në jetë dhe Ai do të jetë gjithçka për ju në vdekje.