Mendime MëngjesiShembull

21 Janar

Për këtë edhe lutemi: për ndreqjen tuaj.

2 e Korintasve13:9

Kërkoni shkallë më të larta të hirit. Le të jetë standardi dhe synimi juaj më i larti. Mos vendosni kufizime ndaj asaj që Perëndia nuk e ka kufizuar. Kurrë mos ndaloni së prituri derisa Ai të pushojë së dhëni. Nuk ka shenjë më të keqe sesa të jeni të kënaqur me masën tuaj të tanishme të hirit. Të jesh i kënaqur me një gjendje të palëvizshme në jetën hyjnore të vendos në pozitë të dyshimtë. Tipari thelbësor i hirit është që ai rritet. Hiri është fara e pavdekshme e Perëndisë dhe, nga vetë natyra e tij, duhet të mbijë e të lulëzojë. Nëse besimi yt nuk shtohet, do të shtohen dyshimet dhe, nëse hiri yt nuk forcohet, do të forcohet frika jote.

Sikurse edhe ka thënë dikush, mbushe masën me grurë dhe nuk ka për të mbetur vend për byk. Synoni parime më të larta, nëse dëshironi praktika më të larta. Parimet e ulëta të çojnë pashmangshmërisht në praktika të ulëta. Ruhuni kundër asaj që priret ta dobësojë gjallërinë e hirit tuaj. Ruhuni nga mëkatet që ju rrethojnë, kini kujdes nga vetësiguria, kini kujdes nga idhujtaria e krijesës, kini kujdes nga bota. Kini kujdes edhe nga çdo neglizhencë e mjeteve të hirit. Perëndia i ka caktuar kanalet përmes të cilave e dërgon hirin e Tij. Kini kujdes që të mos përbuzni asnjërin prej tyre. Shenjtërorja e neglizhuar, froni i hirit i braktisur, Bibla e palexuar shumë shpejt do të sjellin dobësimin e shpirtit tuaj. Perëndia ka caktuar mjetet e hirit sikurse ka caktuar edhe hirin e mjeteve.