Mendime MëngjesiShembull

18 Janar

I fuqishëm për të shpëtuar.

Isaia 63:1

Le t’i hedhim një vështrim mënyrës së pushtetshme me të cilën Ai kryen veprat e Tij të fuqishme të hirit. Vini re sjelljen e Tij. A kishte ndonjëherë diçka që tregoi vetëdijen e një inferiori, nënshtrimin e një të varuri, dobësinë e një të vdekshmi apo papërsosmërinë e një mëkatari? A nuk shkëlqeu vallë Perëndia përmes njeriut me mahnitje madhështore kur i tha lebrozit: “Dua, qofsh i pastruar”; kur i tha burrit me dorën e tharë: “Shtrije dorën tënde”; kur i tha të verbrit: “Merr dritën e syve”; kur i tha të vdekurit: “Unë po të them: Çohu” dhe kur u tha dallgëve të egërsuara: “Paqe, pusho”? Lexues i dashur, a je besimtar që e përjeton Jezusin? Atëherë, ky Krisht i gjithëpushtetshëm ka në zemër më të mirën për ty. Ai është i gjithëpushtetshëm për të të shpëtuar, i gjithëpushtetshëm për të të mbrojtur, i gjithëpushtetshëm për të të çliruar, i gjithëpushtetshëm për t’i nënshtruar të gjitha paudhësitë e tua, për të të bërë të përulur, të shenjtë e të bindur. E gjithë fuqia qëndron në Të. “Atit në qiell i pëlqeu që në Të” - në Të si Ndërmjetësi i Kishës së Tij - “të banojë e gjithë plotësia.” Nuk ka asnjë prishje të cilën Ai të mos jetë i gjithëpushtetshëm për ta vënë poshtë; nuk ka asnjë tundim që Ai të mos jetë i gjithëpushtetshëm për ta mundur; nuk ka asnjë armik mbi të cilin Ai të mos jetë i gjithëpushtetshëm për të ngadhënjyer; nuk ka asnjë frikë që Ai të mos jetë i gjithëpushtetshëm për ta qetësuar. “Çdo pushtet” është gjuha e Tij ngushëlluese, “çdo pushtet më është dhënë Mua në qiell dhe mbi tokë.”