Mendime MëngjesiShembull

16 Janar

Në rast se bijtë e tij braktisin ligjin Tim dhe nuk ecin, sipas urdhërimeve të Mia, në rast se shkelin statutet e Mia dhe nuk respektojnë urdhërimet e Mia, Unë do ta dënoj shkeljen e tyre me thupër dhe paudhësinë e tyre me të rrahura, por nuk do ta heq mirësinë Time prej tij dhe nuk do të lë që besnikëria Ime të jetë e mangët.

Psalmet89:30-33

Dashuria hyjnore disiplinon për shkak se dallon nevojën për korrigjim. Dashuria e Zotit nuk është një ndjenjë e verbër. Ajo sheh gjithçka dhe heton zemrën. Kur është treguar ndonjëherë i verbër Ai ndaj marrëzive të popullit të Tij? Kur i ka injoruar ndonjëherë dashuria e Tij largimet e tyre të mëkatshme? A u tregua Ai i verbër ndaj mosbesimit të Abrahamit? Ai e disiplinoi për atë gjë. A ishte Ai i verbër ndaj mashtrimit të Jakobit? Ai e disiplinoi për atë gjë. A u tregua i verbër ndaj vetëlavdërimit të Hezekias? Ai e disiplinoi për atë gjë. A u tregua i verbër ndaj shkeljes së kurorës dhe vrasjes së kryer nga Davidi? Ai e disiplinoi për atë gjë. A ishte i verbër ndaj idhujtarisë së Solomonit? Ai e disiplinoi për atë gjë. A u tregua i verbër ndaj mosbindjes së Jonas? Ai e disiplinoi për atë gjë. A ishte i verbër ndaj vetëdrejtësisë së Jobit? Ai e korrigjoi për atë gjë. A ishte i verbër ndaj mohimit të Pjetrit? Ai e qortoi për atë gjë. Është mëshirë ndaj nesh të dimë që dashuria i dallon paudhësitë tona, që thuprën që ushtron korrigjimin e mban dashuria dhe jo drejtësia, hiri dhe jo hakmarrja. Fëmijë i disiplinuar i Zotit, mos vallë mendon se Ati yt do të të kishte prekur në ndjenjat e tua më të prekshme dhe në vajtimin tënd më të thellë po të mos e kishte konsideruar vërtet të nevojshme? Po të mos kishte dalluar asnjë paudhësi, asnjë mangësi, asnjë largim, asnjë njollë, ti do të kishe përjetuar “të puthurat e gojës së Tij” në vend të goditjeve të thuprës së Tij. Megjithatë, besoje, sepse Ai e ka shpallur; fshikullimat e thuprës së Tij janë po aq fryt dhe shprehje e dashurisë së Tij sa edhe “të puthurat e gojës së Tij”. “Sepse Zoti disiplinon çdo fëmijë të cilin e do.”