Mendime MëngjesiShembull

13 Janar

Dhe kur të ketë ardhur, Ai do ta bindë botën për mëkat, për drejtësi dhe për gjyq.

Gjoni 16:8

Ky është ofiqi i madh i Frymës. Kjo është puna e Tij e parë, para se ta çojë shpirtin të prehet në flijimin madhështor për mëkatin. Shpirti nuk hedh qoftë edhe një hap drejt Krishtit derisa të jetë shpallur fajtor e i dënuar nga ligji i Perëndisë. Kjo është vepra e Frymës. I shkëlqyeri Njuton thotë: "Asnjeri nuk është ndjerë, as ka për t’u ndjerë mëkatar i humbur, mjeran dhe i urryer pa u bindur në mënyrë të fuqishme e të mbinatyrshme prej Frymës së Perëndisë.". Cili është instrumenti përmes të cilit Fryma na bind për mëkatin në mënyrë kaq të fuqishme dhe të mbinatyrshme? Kësaj pyetjeje i përgjigjemi duke thënë, përmes Ligjit: "Përmes ligjit arrihet njohja e mëkatit.". Ligji ishte mësuesi ynë për të na sjellë tek Krishti. Ligji, i cili vjen në ndërgjegje përmes Frymës së Shenjtë, e dënon njeriun dhe e bën që të dënojë edhe veten; e ngre lart pamjen e shenjtërisë së Perëndisë, pastërtinë dhe pandryshueshmërinë e çdo urdhërimi, dhe i krahason këto me padrejtësinë, fajin dhe mjerimin e mëkatarit dhe, kështu, e bën shpirtin të bjerë me fytyrë në pluhur, duke shpallur me çdo përulësi dhe duke akuzuar veten se "ligji është i shenjtë, i drejtë dhe i mirë; unë jam fajtor, fajtor, fajtor.". Përmes këtij instrumenti - ligjit të Perëndisë - Fryma e Shenjtë e bind shpirtin për mëkat në mënyrë të efektshme dhe e bën të përulet para Perëndisë.