အယူသီးSample

ဘုရားပေးသောစိတ်သဘော

ခရစ်တော်၌ရှိသောယုံကြည်သူများသည် မြန်မာ့အယူသီးမှုများကို လက်မခံသင့်ပေ။ သို့သော် မိမိကြီးပြင်းလာရာယဉ်းကျေးမှု၊ ပတ်ဝန်းကျင်နှင့် စာပေများကြောင့် ဤအရာများသည် ကျွန်တော်တို့၏စိတ်ထဲ၌စွဲကပ်နေတတ်သည်။ အယူသီးခြင်းသည် ကြောက်စိတ်ကိုသာ ဖြစ်စေသည်။ သို့သော်၊ ဘုရားသခင်သည် မိမိသားသမီးများကို ကြောက်ရွံ့သောစိတ်နှင့် အသက်ရှင်ရန် အလိုတော်မရှိပါ။

ဘုရားသခင်သည် ကြောက်တတ်သောစိတ်သဘောကို ငါတို့အား ပေးတော်မူသည်မဟုတ်။ တန်ခိုးပါသောစိတ်၊ ချစ်တတ်သောစိတ်၊ ရှင်းလင်းသောစိတ်သဘောကို ပေးတော်မူ၏ (၂ တိ၊ ၁း၇ခ။ ယုဒသန်ဗားရှင်း)။

ထို့ကြောင့်၊ ဘုရားသခင်ပေးတော်မူသောရှင်းလင်းသောစိတ်ဖြင့် မိမိအသက်တာ၌ အကျိုးမပေးသော၊ မှားယွင်းသောမိစ္ဆာအယူသီးမှုများကို ရဲရဲဝံ့ဝံ့ပယ်ရှင်းပစ်ကြပါစို့။

ငယ်စဉ်ကတည်းက အယူသီးမှုများနှင့် ကြီးပြင်းလာရသောကြောင့် ၎င်းတို့ကို စိတ်ထဲမှပယ်ထုတ်ရန် ခက်ခဲကောင်းခက်ခဲပါလိမ့်မည်။ သို့သော်၊ ယုံကြည်သူသည် မည်သို့ အောင်မြင်နိုင်မည်နည်း။ ဝိညာဉ်တော်၏ဓားတည်းဟူသောနှုတ်ကပတ်တော်အားဖြင့်သာ အောင်မြင်နိုင်ပါသည်။

အောက်ပါနှုတ်ကပတ်တော်များကို လက်နက်သဖွယ်စွဲကိုင်အသုံးပြုပါ။

ကယ်တင်ခြင်းတည်းဟူသောသံခမောက်လုံးကိုလည်းကောင်း၊ ဘုရားသခင်၏နှုတ်ကပတ်တော်တည်းဟူသောဝိညာဉ်တော်၏ဓားကိုလည်းကောင်း ယူကြလော့ (ဧ၊ ၆း၁၇။ ယုဒသန်ဗားရှင်း)။

တစ်ဖန်ကျမ်းစာတော်တွင်၊

သင်မူကား၊ ဝန်ခံတော်မူသောသူ၊ ရှက်ကြောက်စရာအကြောင်းမရှိဘဲ၊ သမ္မာတရားကို မှန်ကန်စွာပိုင်းခြားတတ်သောဆရာသမားဖြစ်လျက်၊ ဘုရားသခင့်ရှေ့၌ ကိုယ်ကိုကိုယ် ဆက်သခြင်းငှာ ကြိုးစားအားထုတ်လော့ (၂တိ၊ ၂း၁၅။ ယုဒသန်ဗားရှင်း)။

ဂျပန်ဆာမူရိုင်းစစ်သည်တော်များအကြောင်းကို လူတိုင်းသိကြသော်လည်း၊ သူတို့ဖြတ်သန်းခဲ့ရသောပြင်းထန်သည့်လေ့ကျင့်မှုများအကြောင်းကိုမူ လူနည်းစုသာသိကြသည်။ သူတို့သည် မိမိတို့၏သခင်နှင့် နိုင်ငံတော်အတွက် စစ်ပွဲဝင်နိုင်ရန်၊ ငယ်စဉ်ကလေးဘဝမှစ၍ အရွယ်ရောက်သည်အထိ ဆရာသမား၏လမ်းညွှန်မှုအောက်တွင် ပြင်းထန်ကျပ်တည်းသောဓားရေးလေ့ကျင့်မှုများကို နေ့စဉ်ကြိုးစားအားထုတ်ခဲ့ကြသည်။

ဆာမူရိုင်းတို့သည် အတတ်နိုင်ဆုံးအသုံးဝင်သူများဖြစ်လာစေရန်အတွက်၊ နာရီတိုင်း၊ မိနစ်တိုင်း၊ စက္ကန့်တိုင်းကို ဓားပညာလေ့လာဆည်းပူးခြင်းဖြင့်သာ ကုန်လွန်စေခဲ့ကြသည်။

ကျွန်တော်တို့သည်လည်း ခရစ်တော်၏စစ်သည်တော်များဖြစ်ကြသည်မဟုတ်ပါလား။ ဆာမူရိုင်းတို့သည် မိမိတို့၏ဓားကို ကျွမ်းကျင်စွာကိုင်စွဲနိုင်ရန် လေ့ကျင့်သကဲ့သို့၊ ကျွန်တော်တို့သည်လည်း မိမိနှင့် သူတစ်ပါး၏အသက်တာ၌ အယူသီးခြင်း၏နှောင့်ယှက်မှုများကို ပယ်ရှားအောင်မြင်နိုင်ရန်အတွက် ဘုရားသခင်၏နှုတ်ကပတ်တော်တည်းဟူသောဝိညာဉ်ဓားကို နေ့စဉ်လေ့ကျင့်ကိုင်စွဲရမည်ဖြစ်သည်။

သမ္မာတရားကို မှန်ကန်စွာပိုင်းခြားတတ်သောယုံကြည်သူသူရဲကောင်းများသည် နှုတ်ကပတ်တော်ဓားကို ကောင်းစွာကိုင်စွဲလျှင် ကောင်းစွာတိုက်ခိုက်နိုင်သောကြောင့် ဘုရားသခင်အတွက် အကျိုးပြုနိုင်သလို၊ ကိုယ်တော်၏နိုင်ငံတော်အတွက်လည်း ထိရောက်စွာတိုက်ခိုက်နိုင်ကြသည်။

ဝိညာဉ်ဓားကိုကိုင်စွဲပြီး လူအများအား နှောင့်ယှက်တတ်သောအယူသီးမှုများကို ထာဝရဘုရား၏နာမတော်အားဖြင့် ကျွမ်းကျင်စွာပယ်ဖြတ်ကြပါစို့။

မိတ်ဆွေသည် ဤဝိညာဉ်ဓားကိုအသုံးပြုရန် မကျွမ်းကျင်သေးပါက၊ ဤအစီအစဉ်ကို ပြီးမြောက်အောင် သေချာစွာဖတ်ရှုလေ့လာပါ။ ထိုသို့ပြုလုပ်လျှင် မိတ်ဆွေသည် မိမိသခင်အဖို့ အလွန်အောင်မြင်သောစစ်သည်တော်တစ်ယောက်ဖြစ်လာပါလိမ့်မည်။

မိတ်ဆွေသည် ဝိညာဉ်ဓားကိုအသုံးပြုပြီး မိမိသခင်အတွက် အကျိုးပြုသူဖြစ်နေပါသလား။

အယူသီးခြင်းက မိတ်ဆွေကို နှောင့်ယှက်နေသလား (သို့) မိတ်ဆွေက အယူသီးမှုများကို ပယ်ဖြတ်နေသလား။