အယူသီးSample

ရာသီခွင်

ယုံကြည်သူအချို့သည် ယနေ့ထက်တိုင် ရာသီခွင်များကို ယုံကြည်စွဲလမ်းနေကြဆဲဖြစ်သည်။ အို ချစ်ဓမ္မမိတ်ဆွေ၊ ဤအရာသည် အလွန်မှောင်မိုက်သောအယူအဆပင်ဖြစ်သည်။ ကောင်းကင်ယံရှိ အသက်မဲ့သောကြယ်များသည် မိမိ၏အနာဂတ်ကို အဘယ်သို့လမ်းညွှန်နိုင်မည်နည်း။ ထာဝရဘုရားသခင်သည် ခပ်သိမ်းသောကြယ်များကိုဖန်ဆင်း၍ အသီးအသီးတို့ကို သမုတ်တော်မူသည်မဟုတ်ပါလား။

ထို့ကြောင့်၊ ဖန်ဆင်းခံကြယ်များ၏လမ်းပြမှုကို အဘယ်ကြောင့် တောင့်တနေရမည်နည်း။ ဖန်ဆင်းရှင်ဘုရားသခင်၏လမ်းပြတော်မူခြင်းကိုသာ ခံယူသင့်သည်မဟုတ်ပါလား။

ထာဝရဘုရားရှင်ကို လုံးလုံးယုံကြည်လက်ခံသောအခါ အနာဂတ်ရေး၊ ပြဿဒါးနေ့၊ ရာဇနေ့များအကြောင်း စိတ်ပူစရာမလိုပါ။

“ကိုယ်တော်၏ မျက်စိတော်သည် ကျွန်ုပ်၏ မဖွဲ့စည်းရသေးသော ကိုယ်ခန္ဓာကို မြင်တော်မူ၏။
ကျွန်ုပ်အတွက် သတ်မှတ်ထားသော နေ့ရက်အပေါင်းတို့သည်
တစ်နေ့မျှ မရောက်မီကပင်
ကိုယ်တော်၏ စာအုပ်၌ ရေးမှတ်ထားနှင့်ပြီးဖြစ်၏။”

ထာဝရဘုရားရှင်၏အထွတ်အမြတ်အာဏာတော်နှင့် ၎င်းကတိတော်ကို ယုံကြည်စွဲလမ်းလျှင် ပြဿဒါးနေ့၊ ရာဇနေ့များအကြောင်း စိတ်ပူစရာမလိုဘဲ သီလနှင့်ပြည်စုံသောမိန်းမကဲ့သို့ နောင်ကာလ၌ ဝမ်းမြောက်လိမ့်မည် (သု၊ ၃၁း၂၅)။

ဘုရားသခင်သည် ကောင်းမြတ်တော်မူ၍ မိမိသားတော်မြတ်၏အသွေးတော်အားဖြင့် အောက်ပါကတိတော်ကိုဝယ်ယူ၍ စာရှုမိတ်ဆွေနှင့်လည်း ထိုအရာများသည် သက်ဆိုင်ပါသည်။

တစ်ဖန်မိန့်တော်မူသည်ကား၊ ငါသည် သင်တို့ကို အကျိုးနည်းစေခြင်းငှာ ကြံစည်သောအကြံမဟုတ်ဘဲ၊ သင်တို့သည် မျှော်လင့်သောအကျိုးကိုရမည်အကြောင်း၊ ငြိမ်ဝပ်စေခြင်းငှာသာ၊ သင်တို့အဖို့ ကြံစည်သောအကြံတို့ကို ငါသိ၏ (ယေ၊ ၂၉း၁၁။ ယုဒသန်ဗားရှင်း)။

အရာရာ၌ ဘုရားသခင်၏အထွတ်အမြတ်အာဏာကို အောက်မေ့သတိရပါ။ မိမိ၏အနာဂတ်သည် ကံကြမ္မာအပေါ်တွင် မတည်ပါ။ ဘုရားသခင်၏လက်တော်ထဲ၌သာ ရှိတော်မူသည်။

ထို့နည်းတူစွာ၊ မြန်မာလူမျိုးအများစုနှင့် ခရစ်ယာန်အချို့ပင်လျှင် မိမိမွေးဖွားသည့် နေ့နံအပေါ်မူတည်၍ မိမိ၏စရိုက်လက္ခဏာများဖြစ်တည်လာသည်ဆိုသော အယူသီးမှုကို ယုံကြည်ကြပေသည်။ ခြင်္သေ့နံ (အင်္ဂါနေ့) ဖွားအချို့သည် အခြားခြင်္သေ့နံဖွားများနှင့်သဟဇာတမဖြစ်တတ်ကြပေ။ အခြားသူများမှာမူ မိမိတို့၏နေ့နံများ ကိုက်ညီမှုရှိသောကြောင့် အလွယ်တကူအဆင်ပြေတတ်ကြသည်။ အချို့က မိမိတို့၏စရိုက်လက္ခဏာများကို ဤအရာက ပြဋ္ဌာန်းထားသည်ဟု ဆိုကြပြီး၊ အချို့နေ့ရက်ကိန်းဂဏန်းများသည် အခြားနေ့ရက်ကိန်းဂဏန်းများထက် ပိုမိုမင်္ဂလာရှိလျက်၊ ပိုမိုကံကောင်းစေသည်ဟုလည်း ယူဆကြသည်။

ခရစ်ယာန်များအနေဖြင့် ဤသို့သောအဓိပ္ပာယ်မဲ့သည့်အရာများကို မယုံကြည်သင့်ပေ။ မိတ်ဆွေမည်သူမည်ဝါဖြစ်သည်ကို မိမိမွေးဖွားသောနေ့ရက်က ပုံဖော်ပေးခြင်းမဟုတ်ဘဲ၊ ဘုရားသခင်ကသာလျှင် ပုံဖော်ပေးခြင်းဖြစ်ပေသည်။

ဘုရားသခင်သည် မိမိ၏တရားစီရင်ရာအန္တိမနေ့၌ နက္ခတ်ဗေဒင်ဆရာများကို အမှိုက်ကဲ့သို့ မီးလောင်ကျွမ်းခြင်းခံရမည်ဟု ရှင်းလင်းစွာဖော်ပြထားပေသည်။

သင်သည် များပြားသောတိုင်ပင်ခြင်းအားဖြင့် ပင်ပန်းလှပြီ။ မိုးကောင်းကင်ကို ကြည့်ရှုသောသူ၊ ကြယ်နက္ခတ်တို့ကို မှတ်သောသူ၊ သင်၌ဖြစ်လတ္တံ့သောအမှုကို၊ လ၏အခြင်းအရာအားဖြင့် ဟောတတ်သောသူတို့သည်ထ၍ သင့်ကို ယခုကယ်တင်ကြစေ။ သူတို့သည် အမှိုက်ကဲ့သို့ဖြစ်၍ မီးရှို့ခြင်းကိုခံရကြလိမ့်မည်။ မီးအရှိန်မှ မိမိတို့ကိုမကယ်မနုတ်ရကြ။ နွေးစရာဖို့ မီးတစ်ခဲမျှ၊ လှုံစရာဖို့ မီးအလျှင်းမျှမကျန်ရစ်ရ (ဟေရှာ၊ ၄၇း၁၃-၁၄။ ယုဒသန်ဗားရှင်း)။

၎င်းသတိပေးစကားသည် အလွန်လေးနက်၍ ကြောက်လန့်ဖွယ်ကောင်းသောမိန့်တော်မူချက်ဖြစ်သည်။ သို့ဖြစ်၍၊ ထာဝရဘုရားသည် မိမိ၏ပရောဖက်ကြီးယေရမိမှတစ်ဆင့် ဤသို့မိန့်တော်မူခဲ့ပေသည်...

ထာဝရဘုရားမိန့်တော်မူသည်ကား၊ သာသနာပလူတို့၏ဘာသာဓလေ့၌ မကျင်လည်ကြနှင့်။ သာသနာပလူတို့ထိတ်လန့်ကြောက်တတ်သောမိုးကောင်းကင်နိမိတ်တို့မှ မထိတ်လန့် မကြောက်ကြနှင့်။ လူအမျိုးမျိုးကျင့်သောအကျင့်ဓလေ့တို့သည် အချည်းနှီးဖြစ်ကြ၏ (ယေ၊ ၁ဝး၂။ ယုဒသန်ဗားရှင်း)။

တားရော့ကတ်များကို မမေးမြန်းပါနှင့်။ ဤမှားယွင်းသောမိစ္ဆာဒိဋ္ဌိအရာများကို ရှင်းပြပေးရန်အတွက် တားရော့ဆရာများအပေါ်၌လည်း မှီခိုအားထားမပြုပါနှင့်။ ထိုသို့ပြုမည့်အစား၊ သမ္မာကျမ်းစာကို ဖတ်ရှုလျက် မိတ်ဆွေအား သမ္မာတရားကို ရှင်းလင်းသွန်သင်ပေးမည့် တစ်ဆူတည်းသောဥပဇ္ဈာယ်ဆရာဖြစ်တော်မူသော သန့်ရှင်းသောဝိညာဉ်တော်ကိုသာ မှီခိုအားထားပါစေ။

ကျွန်တော်တို့၏ဉာဏ်ပညာသည် တားရော့ကတ်များနှင့် ကြယ်များအားဖြင့်မလာဘဲ ခပ်သိမ်းသောကြယ်များကို ဖန်ဆင်းသောအရှင်ထံတော်မှသာလာသည် (ယာ၊ ၁း၅)။ နက္ခတ်တာရာသည် ကျွန်တော်တို့၏လမ်းခရီးကို မလင်းစေဘဲ နှုတ်ကပတ်တော်တရားသာ လင်းစေသည် (ဆာ၊ ၁၁၉း၁၀၅)။

မိတ်ဆွေသည် ရာသီခွင်ကို ယုံကြည်စွဲလမ်းနေပါသလား။ သမ္မာကျမ်းစာထက် ပြက္ခဒိန်ကို ပိုမိုကြည့်ရှုနေပါသလား။