အယူသီးSample

အယူသီးခြင်းအကြောင်းတရား

ရှေးဦးအသင်းတော်ဖခင်ကြီးများ၏ဓမ္မစာပေများကို ဖတ်ရှုလေ့လာလျှင်၊ ခရစ်တော်၏အသေခံတော်မူခြင်းနှင့် ထမြောက်ရှင်ပြန်တော်မူခြင်းအပေါ်သူတို့ထားရှိသော စိတ်အားထက်သန်မှုနှင့် ယုံကြည်စိတ်ချမှုကို အထင်အရှားတွေ့မြင်ခံစားနိုင်ပါသည်။ ဤအဖြစ်အပျက်များသည် ဝိညာဉ်လောကရှိအယူသီးခြင်း၊ မှော်အတတ်များနှင့် မှောင်မိုက်သောအရာများအားလုံးအပေါ် ခရစ်တော်၏အောင်ပွဲခံခြင်းဖြစ်ကြောင်း သူတို့ နားလည်သဘောပေါက်ခဲ့ကြသည်။

ထိုခေတ်တွင်၊ လူအများအပြား ခရစ်တော်ထံသို့ပြောင်းလဲလာကြသဖြင့်၊ မိစ္ဆာနတ်ဆိုးများသည် ရှုံးနိမ့်၍ နှင်ထုတ်ခြင်းခံရကြောင်း၊ ရှေးဟောင်းအဲဂုတ္တုနှင့် ဂရိနတ်ဘုရားများသည် လူတို့အပေါ် လွှမ်းမိုးနိုင်စွမ်းမရှိတော့ကြောင်း အသင်းတော်ဖခင်ကြီးများက ဝမ်းမြောက်စွာကြွေးကြော်ခဲ့ကြသည်။ မှော်ဆရာများသည် လိမ်လည်သူများသာဖြစ်ကြောင်း ဖော်ထုတ်ခဲ့ကြပြီး၊ မှော်အတတ်နှင့် ကျိန်စာများသည်လည်း တန်ခိုးအာဏာပျက်ပြယ်သွားပြီဟု ဆိုခဲ့ကြသည်။

သို့သော်၊ နှစ်ပေါင်း (၁၅၀၀-၂၀၀၀) ခန့် ကြာမြင့်ပြီးနောက် ယနေ့အချိန်တွင်၊ မြန်မာနိုင်ငံရှိ လူများစွာတို့သည် (ခရစ်ယာန်များသာမက အမှုတော်ဆောင်များပါမကျန်) အယူသီးမှုများ၏လွှမ်းမိုးဖြားယောင်းမှုကို ခံနေကြရဆဲဖြစ်သည်။ ဤသို့လုံးဝမဖြစ်သင့်ပေ။

ဝမ်းနည်းစရာမှာ မြန်မာခရစ်ယာန်ယုံကြည်သူအများစုသည်လည်း သမ္မာသတိကင်းမဲ့လျက် ဘုရားသခင်၏နှုတ်ကပတ်တော်နှင့် မသက်ဆိုင်သောအယူသီးမှုများကို လက်ခံကျင့်သုံးနေကြဆဲဖြစ်ပါသည်။

ထို့ကြောင့်၊ မြန်မာလူမျိုးကို နှောင့်ယှက်နေသောအယူသီးမှုကို ဘယ်လိုပယ်ရှားနိုင်မလဲ။ အဖြေက၊ သမ္မာတရားအားဖြင့် အယူသီးမှုကိုပယ်ရှားလျက် ပြန်လည်အောင်မြင်နိုင်သည်။

သမ္မာတရားကိုလည်းသိကြသဖြင့်၊ ထိုတရားသည် သင်တို့ကိုလွှတ်လိမ့်မည်ဟု အရှင်ယေရှုဘုရားမိန့်တော်မူခဲ့သည် (ယော၊ ၈း၃၂က။ ယုဒသန်ဗားရှင်း)။

မြန်မာနိုင်ငံတွင် ထူးဆန်းလှသောအယူသီးမှုများစွာရှိပါသည်။ ချစ်ဓမ္မမိတ်ဆွေ၊ အောက်ပါမြန်မာအယူသီးမှုများကို ကြားဖူးပါသလား။

• ကိုယ်ဝန်ဆောင်မိခင်များသည် ဆပ်ပြာနှင့်ရေမချိုးရ။

• ခရီးသွားစဉ်တွင်၊ ဘယ်အချိန်လောက်ရောက်မလဲဟု ကားမောင်းသူအား မမေးရ။

• သရဲတစ္ဆေနှင့် နတ်ဆိုးများလန့်ပြေးစေရန် မိမိဆိုင်ရှေ့တွင် မှန်အသေးစားလေး ချိတ်ဆွဲထားရမည်ဖြစ်သည်။

• မိမိ၏ပတ်ဝန်းကျင်၌ နာရေးရှိပါက တစ်ပတ်အတွင်း ခေါင်းမလျှော်ရ။

• ညအချိန်တွင် လက်သည်း၊ ခြေသည်း မညှပ်ရ။ ထိုသို့ပြုလုပ်ခြင်းကို သရဲတစ္ဆေများ မနှစ်သက်ကြပေ။

• မိမိသေဆုံးမည့်အကြောင်းကို မပြောရ။ ထိုသို့ပြောမိပါက မကြာမီရုတ်တရက် သေဆုံးတတ်သည်။

ဤအရာများသည် ယုတ္တိမရှိ၊ အဓိပ္ပာယ်မဲ့သောလောကီအယူအဆများသာဖြစ်သည်။ ဆေးပညာရှင်များတချို့ပင် ဆေးပညာနှင့်မညီညွတ်ဘဲ ကျန်းမာရေးကိုထိခိုက်စေနိုင်သောရှေးရိုးစွဲအယူများနှင့် ဒဏ္ဍာရီစကားကို အတည်ပြုပြောဆိုတတ်ကြသည်။

မိန်းမအိုပြောတတ်သောတရားမဲ့ဖြစ်သောဒဏ္ဍာရီစကားကိုပယ်ရှား၍ ဘုရားဝတ်၌ မွေ့လျော်ခြင်းအားဖြင့် ကိုယ်ကိုကိုယ်ဆုံးမလော့ (၁တိ၊ ၄း၇။ ယုဒသန်ဗားရှင်း)။

အယူသီးခြင်း၏အဓိကအမြစ်တွယ်ရာမှာ အဝိဇ္ဇာနှင့် မောဟစိတ်ဖြင့် တစ်ဖက်သတ်အယူဝါဒ အစွဲအလမ်းကြီးပြီး၊ ကျိုးကြောင်းမဆင်မခြင်ကြောက်ရွံခြင်းပင်ဖြစ်သည်။ အယူသီးမှုများသည် လူများကို လွှမ်းမိုးချုပ်ကိုင်ထားပြီး ယုံမှားသံသယ၊ မိစ္ဆာဒိဋ္ဌိ၊ ကြောက်ရွံ့သောစိတ်နှင့် ဆင်းရဲဒုက္ခတို့ကိုသာ တိုးပွားစေပါသည်။ သမ္မာကျမ်းစာသည် ၎င်းသမ္မာတရားကို ထင်းရှားစွာဖော်ပြထားပါသည်။

အခြားသောလမ်းသို့ လိုက်ပြေးသောသူတို့သည် များစွာသောဆင်းရဲဒုက္ခကို ခံရကြလိမ့်မည် (ဆာ၊ ၁၆း၄က။ ယုဒသန်ဗားရှင်း)။

အယူသီးမှုအချို့သည် သဘာဝတရားနှင့်သာသက်ဆိုင်သဖြင့်၊ သိပ္ပံပညာ၊ ဆေးပညာ၊ ရူပဗေဒ၊ ဇီဝဗေဒတို့ကို လေ့လာနားလည်လာသောအခါ အမှန်တရားကို သိကျွမ်းလျက် ကြောက်စိတ်မှ လွတ်မြောက်နိုင်ပါသည်။ သို့သော်၊ ဝိညာဉ်ရေးရာနှင့်သက်ဆိုင်သောအခြားအယူသီးမှုများကိုမူ သိပ္ပံပညာက မဖြေရှင်းပေးနိုင်ပါ။ ထိုကဲ့သို့သောဝိညာဉ်ရေးရာကြောက်ရွံ့မှုများမှ လွတ်မြောက်ရန် သမ္မာကျမ်းစာထဲမှ သမ္မာတရားတစ်ခုတည်းကသာကူညီမစပေးနိုင်ပါသည်။

မိတ်ဆွေ၏အသက်တာ၌ အယူသီးခြင်းများကို ယုံကြည်စွဲလမ်းနေပါသလား။ သို့မဟုတ်၊ မိမိပတ်ဝန်းကျင်ရှိ တစ်ဦးဦးသည် အယူသီးသူဖြစ်နေပါသလား။