Get the appအယူသီးSample
ကျိန်ခြင်း
မြန်မာလူမျိုးတို့သည် အောက်လမ်းပညာ၊ စုန်းပယောဂဆေးဝါး၊ နတ်ဝိဇ္ဇာ (သို့) စုန်းကဝေအတတ်ပညာများစသည့် နည်းလမ်းအမျိုးမျိုးဖြင့် တစ်ယောက်ကိုတစ်ယောက် ကျိန်စာတိုက်တတ်ကြသည်။ သို့ဖြစ်၍၊ များစွာသောသူတို့သည် ကျိန်စာသင့်မည်ကိုကြောက်ရွံ့လျက် အသက်ရှင်နေထိုင်ကြရသည်။ သို့ရာတွင်၊ ခရစ်ယာန်များအနေဖြင့် ဤသို့သောအရာများအတွက် စိုးရိမ်ပူပန်စရာမလိုအပ်ကြောင်းကို သမ္မာကျမ်းစာက ရှင်းလင်းစွာဖော်ပြထားပါသည်။
အောက်လမ်းနည်းဖြင့်သော်လည်းကောင်း၊ သဘာဝအယူအဆများအရသော်လည်းကောင်း လာသောကျိန်စာများသည် ဘုရားသားသမီးများကို မထိခိုက်နိုင်ပါ။
စာငှက်သည် အရပ်ရပ်လှည့်လည်၍၊ ဇရက်သည်လည်း ပျံသွားသကဲ့သို့၊ ထိုနည်းတူ အကြောင်းမရှိသောကျိန်ဆဲခြင်းသည် မသင့်မရောက်တတ် (သု၊ ၂၆း၂။ ယုဒသန်ဗားရှင်း)။
အို ချစ်ဓမ္မမိတ်ဆွေ၊ ၎င်းကျမ်းပိုဒ်သည် အလွန်စိတ်ချမ်းသာဖွယ်ရာဖြစ်သည်မဟုတ်ပါလား။ ကျိန်ဆဲခြင်းသည် ခရစ်ယာန်များအပေါ်၌ မသင့်မရောက်တတ်နိုင်ပေ။ ၎င်းသမ္မာတရားကို မည်သို့ပြည့်စုံနိုင်သနည်း။
အဓိက၊ အရှင်ယေရှုခရစ်တော်သည် ကျိန်ခြင်းများကို ချိုးဖျက်ပြီးဖြစ်သည်။
ဤသည်မှာ အရေးကြီးဆုံးသောအချက်ဖြစ်ပါသည်။ ယေရှုခရစ်တော်အားဖြင့် အယူသီးခြင်းဘေးများနှင့် ကျိန်ခြင်းအမင်္ဂလာများသည် ယုံကြည်သူထံသို့ မသက်ရောက်နိုင်တော့ပါ။ မည်သို့ဖြစ်သနည်းဆိုသည်ကို အောက်ပါကျမ်းပိုဒ်တွင် တွေ့နိုင်ပါသည်။
သစ်တိုင်၌ဆွဲထားခြင်းကိုခံရသောသူတိုင်း ကျိန်ခြင်းကိုခံရသောသူဖြစ်သည်ဟု ကျမ်းစာလာသည်နှင့်အညီ၊ ခရစ်တော်သည် ငါတို့အတွက်ကြောင့် ကျိန်ခြင်းကိုခံရသောသူဖြစ်၍၊ ငါတို့ကို ပညတ်တရား၏ကျိန်ခြင်းမှ ရွေးနုတ်တော်မူပြီ (ဂလ၊ ၃း၁၃ခ။ ယုဒသန်ဗားရှင်း)။
ပုထုဇဉ်လူသားများသည် အလွန်သနားဖွယ်ကောင်းလှသောသတ္တဝါများဖြစ်သည်။ လူသားတို့သည် ပညတ်တရားကို စုံစုံလင်လင်မလိုက်နာနိုင်သောကြောင့် ကျိန်ခြင်းကိုခံရနိုင်သည့်အပြင်၊ အခြားသူများထံမှ ကျိန်ဆဲခြင်းများကိုလည်း ခံရတတ်ကြပေသည်။
သို့ရာတွင်၊ ကျွန်တော်တို့ကို နောက်ထပ်မည်သည့်အခါမျှကျိန်စာမသင့်စေရန်အတွက် ကျွန်တော်တို့၏ကျိန်ခြင်းအမင်္ဂလာအလုံးစုံကို ကိုယ်တိုင်ခံယူကာ လက်ဝါးကပ်တိုင်ပေါ်တွင် အသေခံတော်မူသော ယေရှုခရစ်တော်၏ကျေးဇူးတော်သည် ကြီးလှစွတကား။
ပညတ်တရားထံမှဖြစ်စေ၊ အဓမ္မလူများ၏လက်မှဖြစ်စေ မည်သည့်ကျိန်ခြင်းမျှ ကျွန်တော်တို့အပေါ်သို့ နောက်ထပ်ကျရောက်နိုင်တော့မည်မဟုတ်ပေ။ ယေရှုရှင်သည် ကိုယ်တော်၏အဖိုးထိုက်တန်လှသောအသွေးတော်အားဖြင့် ကျိန်ခြင်းအမင်္ဂလာများမှ ထာဝစဉ်ကာကွယ်မှုကို ကျွန်တော်တို့အတွက် ရွေးဝယ်ပေးတော်မူခဲ့ပြီ။
ထို့ကြောင့်၊ ခရစ်ယာန်များသည် ယတြာချေရန် မလိုအပ်ပေ။ အသက်မဲ့အဝိညာဏက အရာဝတ္ထုများ၌တန်ခိုးမရှိချေ။ ယတြာချေခြင်းဖြင့် မိမိ၏ပစ္စုပ္ပန်ဘဝနှင့် အနာဂတ်ကို လုံးဝဥဿုံ မပြောင်းလဲစေနိုင်ပေ။ ကျွန်တော်တို့သည် ကိုယ်တော်ဘုရားနှင့် ကိုယ်တော်၏ အသွေးတော်မှတစ်ပါး အခြားခိုလှုံဖွယ်ရာမလိုအပ်ပေ။ မည်သူတစ်ဦးတစ်ယောက်ထံမှလာသော မည်သည့်ယတြာချေခြင်း၊ အောက်လမ်းမှော်အတတ်၊ နတ်ဝိဇ္ဇာနှင့် ကျိန်စာမျှ မိတ်ဆွေအား ထိခိုက်အန္တရာယ်မပြုနိုင်ပေ။
သင့်တစ်ဖက်၌ လုပ်သောလက်နက်တစ်စုံတစ်ခုမျှ အထမမြောက်ရ (ဟေရှာ၊ ၅၄း၁၇က။ ယုဒသန်ဗားရှင်း)။
သို့ဖြစ်၍၊ မိတ်ဆွေသည် ဤမဟာကတိတော်ကို သိရှိနားလည်လျက် မိမိ၏ဘဝခရီးကို ပြည့်စုံလှသောယုံကြည်စိတ်ချမှုနှင့် ဝမ်းမြောက်ပျော်ရွှင်မှုတို့ဖြင့် ဆက်လက် လျှောက်လှမ်းနိုင်ပေပြီ။ ကျိန်ခြင်းနှင့် အမှောင်ပညာရပ်များကို နောက်ထပ်မကြောက်ရွံ့ပါနှင့်။ ကျွန်တော်တို့သခင်ယေရှုခရစ်အားဖြင့် ကျွန်တော်တို့အား အောင်ခြင်းအခွင့်ကို ပေးသနားတော်မူပြီ။
ချစ်ဓမ္မမိတ်ဆွေသည် ကျိန်ခြင်းမှန်သမျှမှ လွတ်မြောက်ပြီဟု စိတ်နှလုံးအကြွင်းမဲ့ယုံကြည်လက်ခံပြီလား။
About this Plan
မွေးနေ့၊ သောကြာ၊ တနင်္လာ၊ ကေသာဆံဖြတ်မပြုအပ်။ ယောက်ျားလေးများ ထဘီတန်းအောက်မဝင်ရ။ ဘဲဥနှင့် ဖရဲသီးတွဲစားလျှင် သေတတ်၏စသည့် နေ့စဉ်ဘဝမှ အယူသီးမှုများအပါအဝင်၊ သရဲတစ္ဆေများ၊ ဗေဒင်လက္ခဏာ၊ ရာသီခွင်၊ အောက်လမ်းပညာနှင့် ကျိန်စာများကဲ့သို့သောမြန်မာ့ရိုးရာအယူသီးမှုများနှင့်ပတ်သက်၍ သမ္မာကျမ်းစာက မည်သို့ဖော်ပြထားသနည်း။ ဤအစီအစဉ်ကိုစတင်ပြီး ဘုရားသခင်၏နှုတ်ကပတ်တော်မြတ်က မည်သို့သွန်သင်ထားသည်ကို ရှာဖွေလေ့လာကြပါစို့။
More