အယူသီးSample

အောင်မြင်ခြင်းနှင့် အသစ်ပြုပြင်ခြင်း

ဘုရားသခင်မှတစ်ပါး အခြားသောအရာတစ်ခုခုကို ယုံကြည်ကိုးစားသောအခါတိုင်း၊ ၎င်းသည် ရုပ်တုကိုးကွယ်ခြင်းအပြစ်ဖြစ်သွားပါသည်။ ဤသည်မှာ အလွန်ကြီးလေးသောကိစ္စရပ်ဖြစ်ပါသည်။ ရုပ်တုများနှင့် အယူသီးမှုများကို ယုံကြည်ကိုးစား၍ အယူသီးခြင်းနှင့် သက်ဆိုင်သောအကျင့်များကို ကျင့်ဆောင်သူမည်သူမဆို ဘုရားသခင်၏နိုင်ငံတော်သို့ ဝင်ရမည်မဟုတ်ဟု သမ္မာကျမ်းစာတွင် ဖော်ပြထားပါသည်။

ညစ်ညူးသောအရာ၊ စက်ဆုပ်ဖွယ်သောအရာ၊ သစ္စာပျက်သောအရာတစ်စုံတစ်ခုမျှမဝင်ရဘဲ၊ သိုးသငယ်၏အသက်စာစောင်၌ စာရင်းဝင်သောသူတို့သာလျှင်ဝင်ရ၏ (ဗျာ၊ ၂၁း၂၇။ ယုဒသန်ဗားရှင်း)။

အို ချစ်ဓမ္မမိတ်ဆွေ၊ သိုးသငယ်၏အသက်စာစောင်၌ စာရင်းဝင်သောသူများတည်းဟူသောစစ်မှန်သောယုံကြည်သူများသည် ရုပ်တုများကို ရှိခိုးမည်မဟုတ်သလို၊ အယူသီးမှုများကိုလည်း ယုံကြည်လက်ခံကြမည်မဟုတ်ပေ။

(တ၊ ၁၉) တွင်၊ ဧဖက်မြို့၌နေသောယုံကြည်သူအများတို့သည် မိမိတို့၏အယူသီးမှုနှင့်ဆိုင်သောပစ္စည်းဝတ္ထုများကို လုံးဝမနှမြောဘဲ၊ ဘုရားသခင်၏ဘုန်းတော်ကိုထင်ရှားစေခြင်းငှာ ယုံကြည်ခြင်းအပြည့်ဖြင့် စွန့်ပစ်ခဲ့ကြသည်။

နတ်ဝိဇ္ဇာအတတ်ကိုသုံးဆောင်သောသူအများတို့သည်လည်း မိမိတို့စာစောင်ကိုယူခဲ့၍ လူအပေါင်းတို့ရှေ့မှာ မီးရှို့ကြ၏။ စာစောင်အဖိုးကို ချင့်တွက်သော်၊ ငွေအသပြာငါးသောင်းထိုက်သည်ကို သိကြ၏ (တ၊ ၁၉း၁၉။ ယုဒသန်ဗားရှင်း)။

ချစ်ဓမ္မမိတ်ဆွေ၊ မိမိအသက်တာတွင်လည်း အယူသီးမှုနှင့်ဆိုင်သောပစ္စည်းများရှိနေပါသလား။ ရှိနေလျှင် ယခုပင် သမ္မာတရားကို ယုံကြည်စွဲလမ်းလျက်၊ ဧဖက်မြို့၌ရှိသောထိုယုံကြည်သူများကဲ့သို့ ၎င်းပစ္စည်းများကို စွန့်ပစ်လိုက်ပါ။ အဝိဇ္ဇာပစ္စည်းအပေါ်မှာ သံယောဇဉ်ထားစရာမလိုအပ်ပါ။ လုံးဝမနှမြောပါနှင့်။ ထိုအရာများသည် မိမိအသက်တာအတွက် မည်သည့်အကျိုးမျှမပေးနိုင်သည့်အပြင်၊ ဘုရားသခင် စက်ဆုပ်ရွံရှာတော်မူသော အရာများဖြစ်သောကြောင့်ဖြစ်သည်။

သင်တို့သည် လောကီပုံသဏ္ဌာန်ကို မဆောင်ကြနှင့်။ ကောင်းမြတ်သောအရာ၊ နှစ်သက်ဖွယ်သောအရာ၊ စုံလင်သောအရာတည်းဟူသော ဘုရားသခင်အလိုတော်ရှိသောအရာသည် အဘယ်အရာဖြစ်သည်ကိုသင်နိုင်မည်အကြောင်း၊ စိတ်နှလုံးကို အသစ်ပြင်ဆင်၍ ပုံသဏ္ဌာန်ပြောင်းလဲခြင်းသို့ ရောက်ကြလော့ (ရော၊ ၁၂း၂။ ယုဒသန်ဗားရှင်း)။

အထက်ပါကျမ်းစကားနှင့်အညီ မိမိ၏စိတ်နှလုံးကို အသစ်ပြုပြင်ခြင်းအားဖြင့် ပုံသဏ္ဌာန်ပြောင်းလဲခြင်းသို့ ရောက်ကြပါစို့။ အယူသီးခြင်းအနှောင်အဖွဲ့များမှ လွတ်မြောက်ရန် ဘုရားသခင်ထံ အစဉ်မပြတ်ဆုတောင်းလျက်၊ သမ္မာတရားတည်းဟူသောနှုတ်ကပတ်တော်ဖြင့် မိမိစိတ်ကိုပြုပြင်ကြပါစို့။ ပုထုဇဉ်လူသားများဖြစ်သောကျွန်တော်တို့သည် မောဟနှင့် အဝိဇ္ဇာကြောင့် ဘုရားသခင်စက်ဆုပ်ရွံရှာသောအယူသီးမှုအပြစ်များကို ကျူးလွန်မိတတ်ကြပြီး ဘုရားသခင်ရှေ့တော်၌ စုံလင်ခြင်းမရှိကြချေ။

သို့သော်၊ ကျေးဇူးတော်အားဖြင့် ၎င်းအပြစ်ဒုစရိုက်များ တစ်ခါမျှမပြုမိခဲ့သောသခင်ယေရှုဘုရားသည် ကျွန်တော်တို့ကို အလွန်ချစ်သနားပြီး ကယ်တင်စေခြင်းငှာ လက်ဝါးကပ်တိုင်ပေါ်တွင် ကျွန်တော်တို့အပြစ်နှင့် မစုံလင်ခြင်းကိုခံယူ၍ ရက်စက်စွာအသေခံခဲ့သည်။ သုံးရက်မြောက်တွင် ခမည်းတော်ဘုရားသည် သားတော်၏အသက်စွန့်တော်မူခြင်းကိုလက်ခံတော်မူ၍ သေခြင်းမှထမြောက်စေတော်မူခဲ့သည်။ ၎င်းမဟာပေးဆပ်မှုအားဖြင့် အရှင်ယေရှုဘုရား၏စုံလင်တော်မူခြင်းသည် ကျွန်တော်တို့အပေါ်သို့ သက်ရောက်စေတော်မူခဲ့သည်။ အရှင်ယေရှုဘုရား၏စုံလင်တော်မူခြင်း၊ ဖြောင့်မတ်ခြင်းနှင့် လောကုတ္တရာကုသိုလ်တော်အားဖြင့် ကောင်းကင်ဘုံသို့ဝင်စားရနိုင်ပါပြီ။

ဘုရားသခင်သည် အပြစ်နှင့်ကင်းစင်သောသူကို ငါတို့အတွက်ကြောင့် အပြစ်ရှိသောသူဖြစ်စေတော်မူ၏။ အကြောင်းမူကား၊ ငါတို့သည် ထိုသူအားဖြင့် ဘုရားသခင့်ရှေ့တော်၌ ဖြောင့်မတ်သောသူဖြစ်မည်အကြောင်းတည်း (၂ကော၊ ၅း၂၁ခ၊ ယုဒသန်ဗားရှင်း)

တစ်ဖန်ကျမ်းစာတော်တွင်၊

ခရစ်တော်သည် ကိုယ်ခန္ဓာအားဖြင့် အသေသတ်ခြင်းကိုခံ၍၊ ဝိညာဉ်တော်အားဖြင့် အသက်ရှင်ခြင်းသို့ ရောက်တော်မူသည်ဖြစ်၍ ငါတို့ကို ဘုရားသခင့်အထံတော်သို့ ပို့ဆောင်ခြင်းငှာ၊ ဖြောင့်မတ်တော်မူသောသူသည်၊ မဖြောင့်မတ်သောသူတို့အတွက်၊ ဒုစရိုက်အပြစ်များကြောင့် တစ်ခါခံတော်မူ၏ (၁ပေ၊ ၃း၁၈။ ယုဒသန်ဗားရှင်း)။

ခရစ်တော်၏ဧဝံဂေလိတရားသည် အယူသီးမှုမဟုတ်ဘဲ သစ္စာစကားဖြစ်ပြီး၊ အကြွင်းမဲ့ခံယူအပ်သောစကားလည်းဖြစ်သည်။ ထို့ကြောင့်၊ ခရစ်တော်သည် ခပ်သိမ်းသောအယူသီးမှုအမျိုးမျိုးထက် သာ၍တန်ခိုးကြီးမြတ်တော်မူပြီး၊ အောက်လမ်းပညာ၊ ကျိန်စာများနှင့် နတ်ဆိုးများအားလုံး၏တန်ခိုးအာဏာကို ချိုးဖျက်တော်မူသည်။ ယခုမှစ၍ နောက်ဆုံးနေ့တိုင်အောင် ထိုဝိညာဉ်ဓားကို ရဲရင့်စွာကိုင်စွဲပြီး မိမိသခင်ခရစ်တော်ကို ဝမ်းမြောက်စွာအားကိုးလျက် အယူသီးမှုမှန်သမျှကိုအောင်မြင်လျက် ပယ်ရှားကြပါစို့။

ခရစ်တော်၏တရားကိုမလိုက်၊ လူအဆက်ဆက်ခံသောနည်းဥပဒေသနှင့် လောကီတရားနုကိုလိုက်၍၊ လောကီပညာနှင့် အချည်းနှီးသောပရိယာယ်အားဖြင့် သင်တို့ကို အဘယ်သူမျှမလုယူမဖျက်ဆီးစေခြင်းငှာ သတိပြုကြလော့။ အကြောင်းမူကား၊ ဘုရားသခင်၏ဇာတိအဖြစ်တော်၏ပြည့်စုံခြင်းအပေါင်းသည် ခရစ်တော်၌ ကိုယ်ထင်ရှား၍ ကျိန်းဝပ်တော်မူ၏။ အထွတ်အမြတ်အာဏာစက်ရှိသမျှကို အုပ်စိုးတော်မူသောထိုသခင်၌ သင်တို့သည် စုံလင်ခြင်းရှိကြ၏ (ကော၊ ၂း၈-၁၀။ ယုဒသန်ဗားရှင်း)။

ချစ်ဓမ္မမိတ်ဆွေ၊ မိမိအသက်တာမှ ခပ်သိမ်းသောအယူသီးမှုများကို ပယ်ရှားပြီလား။