အယူသီးSample

သရဲတစ္ဆေများ

မြန်မာလူမျိုးများသည် (ယုံကြည်သူများအပါအဝင်) သရဲတစ္ဆေများကို အလွန်အမင်း ကြောက်ရွံ့တတ်ကြသည်။ ယုံကြည်သူအချို့ဆိုလျှင် ညကြီးအချိန်တွင် တစ်ယောက်တည်း အပြင်မထွက်ရဲသည်အထိ (သို့) မိမိအိမ်သာမသွားရဲသည်အထိ ကြောက်တတ်ကြသည်။

သတင်းကောင်းမှာ ဤသင်္ခါရလောကကြီး၌ သရဲတစ္ဆေ (သို့) သေလွန်သူတို့၏ဝိညာဉ်များဟူသည် လုံးဝမရှိပေ။ ကောင်းကင်တမန်များနှင့် နတ်ဆိုးများမှတစ်ပါး အခြားလူ့ဝိညာဉ် (သို့) နာမ်ဝိညာဉ်သတ္တဝါများမကျင်လည်နိုင်ကြချေ။

သမ္မာကျမ်းစာအရ၊ လူသည် တစ်ကြိမ်တည်းသေ၍ ထို့နောက် တရားစီရင်တော်မူခြင်းကိုခံရပြီး၊ ယုံကြည်သူများသည် ကောင်းကင်ဘုံသို့ ဝင်ရောက်စံစားရကာ၊ မယုံကြည်သူများမှာမူ ငရဲဘုံသို့ ကျရောက်ကြရသည် (ဟေဗြဲ၊ ၉း၂၇။ မ၊ ၂၅း၄၆)။

သရဲတစ္ဆေများ (သို့) သေလွန်သူတို့၏ဝိညာဉ်များသည် အမှန်စင်စစ်အားဖြင့် လူတို့ကိုလှည့်ဖြားရန် အယောင်ဆောင်ထားသောနတ်ဆိုးများသာဖြစ်နိုင်သည်။ အရှင်ယေရှုဘုရား၏အသေခံတော်မူခြင်း၊ ထမြောက်တော်မူခြင်းနှင့် အသွေးတော်အားဖြင့် နတ်ဆိုးမှန်သမျှ ရှုံးနိမ့်သွားပြီဖြစ်၍ ယုံကြည်သူများအပေါ်တန်ခိုးအာဏာမရှိကြတော့ပေ။

အထွတ်အမြတ်၊ အာဏာစက်များကိုလုယူလျှင်၊ ထင်ရှားစွာထုတ်ပြ၍ လက်ဝါးကပ်တိုင်တော်အားဖြင့် အောင်ပွဲကိုခံတော်မူပြီ (ကော၊ ၂း၁၅။ ယုဒသန်ဗားရှင်း)။

ထို့ကြောင့် ယုံကြည်သူများသည် သရဲတစ္ဆေအသွင် အယောင်ဆောင်ထားသောနတ်ဆိုးများကို ကြောက်ရွံ့စရာမလိုတော့ပါ။

အေဒီ (၂၅၁-၃၅၆) တွင် အသက်ရှင်ခဲ့သော ရှေးဦးအသင်းတော်ဖခင်ကြီးအဲဂုတ္တုပြည်သား ရှင်အန်ထော်နီသည် တောကန္တာရထဲ၌ မာရ်နတ်နှင့် နတ်ဆိုးများ၏ရန်ကို ရင်ဆိုင်ရခြင်းအပါအဝင် ပြင်းထန်သောဝိညာဉ်တိုက်ပွဲများကိုကြုံတွေ့ခဲ့ရသည်။ မာရ်နတ်နှင့် နတ်ဆိုးတို့၏သဘောသဘာဝနှင့်ပတ်သက်၍ သူက ဤသို့သုံးသပ်မိန့်ဆိုခဲ့သည်...

မာရ်နတ်နှင့် နတ်ဆိုးတို့သည် အပြစ်စီရင်ခြင်းခံရပြီးသောသူဖြစ်၍၊ မိမိသဘောအလျောက် ပြုနိုင်သောတန်ခိုးအာဏာမရှိပါ။ သူတို့သည် တစ်စုံတစ်ခုကို ပြုလုပ်လိုလျှင် ဘုရားသခင်ထံ ခွင့်ပြုချက်တောင်းခံရခြင်းက သူ၏အခြေအနေမှန်ကို ထင်ရှားစေသည်။ ဘုရားသခင် ခွင့်မပြုလျှင် ယောဘ၏တိရစ္ဆာန်များကိုပင် မာရ်နတ်နှင့် နတ်ဆိုးများတို့သည် မထိမတို့နိုင်ခဲ့ပါ (ယောဘ၊ ၁း၉-၁၂)။ ထို့ပြင်၊ ခရစ်ဝင်ကျမ်းတွင် နတ်ဆိုးတို့သည် ဝက်အုပ်ထဲသို့ဝင်ခွင့်ပြုရန် အရှင်ယေရှုဘုရားထံ တောင်းပန်ခဲ့ရသည်ကို ကြည့်လျှင် (မာ၊ ၅း၁၂)၊ ဝက်များအပေါ်၌ပင် သူတို့၌အခွင့်အာဏာမရှိကြောင်း ထင်ရှားနေပါသည်။

တိရစ္ဆာန်များအပေါ်၌ပင် တန်ခိုးအာဏာမရှိလျှင်၊ ဘုရားသခင်၏ပုံသဏ္ဌာန်တော်နှင့်အညီ ဖန်ဆင်းခံထားရသောလူသားတို့အပေါ်၌ အဘယ်မှာတန်ခိုးရှိနိုင်မည်နည်း။

ချစ်ဓမ္မမိတ်ဆွေသည် သရဲတစ္ဆေများ၊ မာရ်နတ်နှင့် နတ်ဆိုးများကို ကြောက်ရွံ့နေပါသလား။ ထိုသို့ ကြောက်ရွံ့နေပါက မခံသင့်ဝန်ထမ်းရပြီ။ အထက်တွင်ဖော်ပြထားသောသမ္မာတရားကို သမ္မာသတိရှိရှိ ယုံကြည်စွဲလမ်းလျက် ကြောက်ရွံ့ခြင်းမှလွတ်မြောက်ပါစေ။ နှုတ်ကပတ်တော်က ဤသို့ဆိုထားသည်...

ချစ်သားတို့၊ သင်တို့သည် ဘုရားသခင်နှင့်စပ်ဆိုင်ကြ၏။ ထိုသူတို့ကိုလည်း အောင်ကြပြီ။ အကြောင်းမူကား၊ သင်တို့ဘက်၌ရှိသောသူသည် လောကဘက်၌ရှိသောသူထက် သာ၍ကြီးတော်မူ၏ (၁ယော၊ ၄း၄။ ယုဒသန်ဗားရှင်း)။

သရဲတစ္ဆေများဟူသည် လုံးဝမရှိကြောင်းနှင့်၊ စာတန်မာရ်နတ်နှင့် နတ်ဆိုးများသည် ရှုံးနိမ့်ပြီးသော ရန်သူများသာဖြစ်ကြောင်းကို သိရှိနားလည်သွားသောအခါ မိမိ၏အသက်တာသည် မည်သို့ပြောင်းလဲသွားမည်နည်း။