အယူသီးSample

ဗေဒင်လက္ခဏာ

ယုံကြည်သူအချို့သည် မိမိတို့၏အနာဂတ်ကို အလွန်သိလိုသောကြောင့် ဗေဒင်ဆရာများထံ သွားရောက်မေးမြန်းတတ်ကြသည်။ အို ချစ်ဓမ္မမိတ်ဆွေ၊ အဘယ်ကြောင့် မောဟဖုံးလွှမ်းလျက်၊ အနာဂတ်ကို မသိမြင်နိုင်သောလူသားများထံ သွားရောက်အားကိုးကြမည်နည်း။ မာရ်နတ်နှင့် နတ်ဆိုးများပင်လျှင် အနာဂတ်ကို မသိနိုင်ပါဘဲလျက်၊ သာမန်ပုထုဇဉ်လူသားဗေဒင်ဆရာတို့သည် အဘယ်သို့သိမြင်နိုင်မည်နည်း။ ၎င်းဆရာသမားတို့သည် မိမိစိတ်ထင်ရာကိုသာ လျှောက်ပြောနေခြင်းဖြစ်၍ မုသားစကားများသာဖြစ်ပေလိမ့်မည်။

ဓမ္မဟောင်းရှိ ဣသရေလလူမျိုး၏ ပထမဦးဆုံးရှင်ဘုရင်၏မဟာပြစ်မှားမှုကို မမေ့ပါစေနှင့်။

ရှောလုသည် ဖိလိတ္တိလူအလုံးအရင်းကိုမြင်သောအခါ ကြောက်၍ အလွန်တုန်လှုပ်သောစိတ်နှလုံးရှိ၏။ ထာဝရဘုရားကို မေးလျှောက်သော်လည်း ထာဝရဘုရားသည် ထူးတော်မမူ... ထိုအခါ ရှောလုက၊ နတ်ဝင်မိန်းမကို ရှာကြလော့... သင်ပေါင်းသောနတ်ကိုအမှီပြု၍ သင့်အား ငါပြောမည့်သူကို ဖော်ပါလော့ဟု တောင်းပန်လေ၏... (၁ရာ၊ ၂၈း၅-၈၊ ယုဒသန်ဗားရှင်း)။

မြန်မာစကားပုံတွင် ဗေဒင်ယုံ ဆန်ကုန်ဟု ဆိုထားသည်မှာ အလွန်မှန်ကန်လှပါသည်။ ဗေဒင်ကို မေးမြန်းလျက် ယုံကြည်ကိုးစားခြင်းသည် ဆင်းရဲဒုက္ခနှင့် စိတ်ရှုပ်ထွေးခြင်းကိုသာ သက်ရောက်စေလိမ့်မည်။ သို့သော် ရှောလုမင်းသည် ဆန်ကုန်သည်သာမက မိမိအသက်ကိုပါ ကုန်ဆုံးစေခဲ့သည်။ အကြောင်းမူကား ရှောလုသည် ထာဝရဘုရားကို မမေးမြန်းဘဲ နတ်ဝင်မိန်းမထံသွား၍ မေးမြန်းခဲ့သောကြောင့် ဘုရားသခင်သည် သူ့ကို အပြစ်ဒဏ်ခတ်သဖြင့် အသက်ဆုံးရှုံးခဲ့ရသည်။

ထိုသို့ရှောလုသည် ထာဝရဘုရား၏စကားတော်ကို နားမထောင်၊ လွန်ကျူး၍ ထာဝရဘုရားကို ပြစ်မှားသောကြောင့်လည်းကောင်း၊ ထာဝရဘုရားကို မမေးမြန်းဘဲ နတ်ဝင်မိန်းမကို ရှာဖွေမေးမြန်းသောကြောင့်လည်းကောင်း၊ ထာဝရဘုရားသည် သူ့ကိုကွပ်မျက်၍၊ နိုင်ငံတော်ကို ယေရှဲသားဒါဝိဒ်၌ လွှဲအပ်တော်မူ၏ (၅ရာ၊ ၁ဝး၁၃-၁၄။ ယုဒသန်ဗားရှင်း)။

အို ချစ်ဓမ္မမိတ်ဆွေ၊ ဤအမှုသည် သေးငယ်သည့်အမှုမဟုတ်ပါ။ ဓမ္မဟောင်းခေတ်တွင်၊ ဘုရားသခင်သည် မိမိ၏ဣသရေလလူမျိုးတော်အဖို့ ဤသို့သတိပေးတော်မူခဲ့သည်။

သင်၏ဘုရားသခင်ထာဝရဘုရားပေးတော်မူသောပြည်သို့ သင်သည် ဝင်စားသောအခါ၊ ထိုပြည်၌နေသောလူမျိုးတို့ပြုတတ်သောစက်ဆုပ်ရွံရှာဖွယ်အမှုတို့ကိုပြုခြင်းငှာ မသင်ရ။ သင်တို့တွင် မိမိသားသမီးကို မီးဖြင့်ပူဇော်သောသူ၊ ဖြစ်လတ္တံ့သောအမှုကို ကိုယ်ဉာဏ်နှင့် ဟောပြောသောသူ၊ ကာလဗေဒင်ကို ကြည့်သောသူ၊ မကောင်းသောအတတ်ကို ပြုစုသောသူ၊ ပြုစားတတ်သောသူ၊ နတ်ဆိုးနှင့်ပေါင်းသောသူ၊ ဝိဇ္ဇာအတတ်ကို ပြုစုသောသူ၊ လူသေကိုမေးမြန်းသောသူတစ်စုံတစ်ယောက်မျှမရှိရ။ ထိုသို့ပြုတတ်သောသူအပေါင်းတို့ကို ထာဝရဘုရားစက်ဆုပ်ရွံရှာတော်မူ၏။ ထိုစက်ဆုပ်ရွံရှာဖွယ်သောအမှုများတို့ကြောင့် သင်၏ဘုရားသခင်ထာဝရဘုရားသည် ထိုလူမျိုးတို့ကို သင့်ရှေ့မှနှင်ထုတ်တော်မူ၏။ သင်သည်၊ သင်၏ဘုရားသခင်ထာဝရဘုရားရှေ့တော်၌ စုံလင်ခြင်းရှိရမည်။ သင်အစိုးရအံ့သောလူမျိုးတို့သည်၊ ကာလဗေဒင်ကို ကြည့်သောသူ၊ ဖြစ်လတ္တံ့သောအမှုကို ကိုယ်ဉာဏ်အားဖြင့် ဟောပြောသောသူတို့စကားကို နားထောင်တတ်ကြ၏။ သင်မူကား ထိုသို့ပြုရအောင် သင်၏ဘုရားသခင်ထာဝရဘုရားသည် အခွင့်ပေးတော်မမူ (တရား၊ ၁၈း၉-၁၄။ ယုဒသန်ဗားရှင်း)။

ထို့ပြင်၊ လက္ခဏာဆရာများကို ယုံကြည်အားကိုးစရာမလိုပါ။ အကြောင်းမူကား၊ ကျွန်တော်တို့၏အနာဂတ်သည် မေတ္တာတော်နှင့်ပြည့်ဝ၍ အနာဒဏ်ရာရသော ကယ်တင်ရှင်သခင်ယေရှု၏လက်ဖဝါးတော်ထဲ၌သာ လုံခြုံလျက်ရှိပါသည်။

ငါသည် ကိုယ်လက်ဝါး၌ သင့်ကိုစာထိုးပြီ... (ဟေရှာ၊ ၄၉း၁၆က။ ယုဒသန်ဗားရှင်း)။

မိမိ၏အနာဂတ်အတွက် လက်ဖဝါးပေါ်ရှိလက္ခဏာများကို အားကိုးခြင်းသည် မိစ္ဆာဒိဋ္ဌိဖြစ်သကဲ့သို့၊ ဘေးအန္တရာယ်မှကာကွယ်ရန်အတွက် အသက်မဲ့အဝိညာဏကအရာဝတ္ထုများနှင့် ဆေးမင်ကို အားကိုးခြင်းသည်လည်း အချည်းနှီးသက်သက်ဖြစ်သည်။

မယုံကြည်သူအချို့သည် မြွေကိုက်ခံရခြင်း၊ ဓားထိုးခံရခြင်းနှင့် လူဆိုးဘေးမှ ကင်းဝေးစေရန်အတွက် မိမိတို့၏အသားအရေပေါ်တွင် ဆေးမင်ကြောင်ထိုးတတ်ကြပါသည်။ စဉ်းစားကြည့်ပါ။ မိမိအသားအရေပေါ်ရှိဆေးမင်သည် ၎င်းဘေးအန္တရာယ်များမှ မည်သို့ ကာကွယ်ပေးနိုင်မည်နည်း။ ယုံကြည်သူများသည် ဤအရာများကို လုံးဝအားမကိုးအပ်ပါ။

ယုံကြည်သူများသည် ထိုကဲ့သို့ဆေးမင်ကြောင် မထိုးကြသော်လည်း၊ ယုံကြည်ခြင်းအားနည်းသူအချို့သည် လက်ဝါးကပ်တိုင်အသေးကို ကိုင်ဆောင်ထားလျှင် (သို့) မိမိဘောင်းဘီအိတ်ကပ်ထဲတွင်ထည့်ထားလျှင် ကံကောင်းမည် (သို့) ဘုရားသခင်၏ကာကွယ်တော်မူခြင်းကိုခံရလိမ့်မည်ဟု မှားယွင်းစွာယုံကြည်တတ်ကြပါသည်။ ဆေးမင်ကြောင်၌ တန်ခိုးမရှိသကဲ့သို့၊ သစ်သားအရာဝတ္ထု၌လည်း တန်ခိုးမရှိပါ။

စစ်မှန်သောယုံကြည်သူများသည် မိမိအသားအရေပေါ်၌ ဆေးမင်ကြောင်မရှိဘဲ၊ မိမိလက်၌ လက်ဝါးကပ်တိုင်မပါဘဲလျက် စိတ်ချလက်ချဘေးကင်းလုံခြုံစွာနေထိုင်နိုင်ကြသည်။ အကြောင်းမှာ၊ မိမိအထက်၌ရှိသောခမည်းတော်ဘုရား၊ မိမိအနီးအပါး၌ရှိသော အရှင်ယေရှုဘုရားနှင့် မိမိအထဲ၌ကိန်းဝပ်တော်မူသော သန့်ရှင်းသောဝိညာဉ်တော်ဘုရား၏ကြည့်ရှုပြုစုကျေးဇူးတော်နှင့် ကာကွယ်တော်မူခြင်းတို့ကို ရရှိခံစားရသောကြောင့်ဖြစ်သည်။

ထာဝရဘုရားသည် ငါ၏ကျောက်၊ ငါ၏မြို့ရိုး၊ ငါ့ကိုကယ်လွှတ်သောသခင်၊ ငါ၏ဘုရား၊ ငါကိုးစားသောအစွမ်းသတ္တိ၊ ငါ၏အကွယ်အကာ၊ ငါ့ကိုကယ်တင်သောဦးချို၊ ငါ၏ရဲတိုက်ဖြစ်တော်မူ၏ (ဆာ၊ ၁၈း၂။ ယုဒသန်ဗားရှင်း)။

သုံးပါးတစ်ဆူဘုရားသခင်မှတစ်ပါး အခြားသောထာဝရခိုလှုံရာမရှိချေ။

မိတ်ဆွေသည် ထာဝရဘုရားနှင့် ကိုယ်တော်၏ဝိညာဉ်တော်ကို အားကိုးမည့်အစား၊ ဗေဒင်ဆရာများ၊ အသက်မဲ့အရာဝတ္ထုများနှင့် ယတြာချေခြင်းများကို အားကိုးနေဆဲဖြစ်ပါသလား။