Hoop wat kaalvoet loopSample

“Kyk op!” Soms verloor ons perspektief op die lewe omdat ons te veel af … en te min op kyk. Dis dán wanneer ons so maklik ons hoop verloor. Vandag roep die Vader jou op jou naam en sê: Kyk op, liewe mens. Kyk op … en sien My. Sien die deernis in my oë, die hande wat na jou uitstrek … die hoop wat ek jou wil gee. Jou Vader ken jou omstandighede, verstaan jou hart, voel jou pyn en weet ook wat die beste vir jou is. Op die régte tyd en op sý manier sal Hy antwoorde, wysheid en uitkoms vir jou gee. Hy sal jou versterk wanneer jy swak is, lei as jy antwoorde soek, troos in jou hartseer en jou ongekend seën. Onthou: Hy hoor jou smeekgebed en sien jou moedelose hart. Hy is reeds by jou om jou vas te hou, te ondersteun en jou die pad vorentoe te wys. God se visie is soveel wyer en verder as ons eie – vertrou Hom. GEDAGTE VIR DIE DAG: Kyk vandag met nuwe hoop op na dié God by wie alles moontlik is. GEBED: Dankie dat U, versiende God, ook my toekoms ken en weet wat ek nodig het. Amen. Hierdie oordenking is geneem uit HOOP WAT KAALVOET LOOP deur Milanie Vosloo © Christelike Uitgewersmaatskappy.