៦ ថ្ងៃជាមួយនឹងព្រះនាមរបស់ព្រះជាម្ចាស់គំរូ

ថ្ងៃទី ៥៖ អេឡូហ៊ី សាដិគី (ELOHE TSADEKI) – ព្រះនៃក្ដីសុចរិតរបស់ខ្ញុំ

យើងតែងតែសម្លឹងរកមើលអ្វីដែលជារឿងធំថ្មីហើយពិសេសជានិច្ច។ ដូចជាអាថ៌កំបាំងនៃការក្លាយខ្លួនជាមនុស្សមានសណ្ដាប់ធ្នាប់។ គន្លឹះនៃការសម្រកគីឡូ ដើម្បីឱ្យរូបរាងស្អាត។ បង្កើតគម្រោងផែនការជាក់លាក់ដើម្បីឱ្យបានស្ថេរភាពខាងផ្នែកថវិកា។ យើងអានសៀវភៅ។​ យើងស្ដាប់មេរៀនជាសំឡេង ហើយចុះឈ្មោះចូលរួមសិក្សាក្នុងសិក្ខាសាលានានា។ ហើយទោះក្នុងខណៈពេលយើងដឹងពីជំនាញថ្មី ស្ដីពីការធ្វើឱ្យខ្លួនចេះមានសណ្ដាប់ធ្នាប់ ធ្វើឱ្យខ្លួនសម្រកគីឡូបានយ៉ាងប្រសើរ និងបង្កើនសន្តិសុខក្នុងរឿងថវិកា ដែលទាំងនេះជាកត្តាសក្ដិសមឱ្យយើងដេញតាមវាក្ដី នោះយើងក៏ត្រូវតែធានាថាខ្លួនយើងមិនភ្លេចអំពីអ្វីដែលជារឿងចម្បងសំខាន់ នៅពេលដែលយើងកំពុងតែស្វែងរកអ្វីដែលជារឿងធំថ្មីនោះដែរ។

គោលដៅចម្បងនៃជីវិត នោះគឺជាការដើរតាមព្រះជាម្ចាស់ ប្រឹងក្លាយខ្លួនឱ្យបានដូចព្រះអង្គ ហើយរស់នៅជីវិតរបស់យើងសម្រាប់ព្រះអង្គ។ ហើយការក្លាយខ្លួនឱ្យបានដូចជាព្រះ នោះគឺមានន័យថា ការរីកចម្រើនលូតលាស់ទៅក្នុងសេចក្ដីល្អ និងសេចក្ដីសុចរិតនៃព្រះ។ ចេញមកពីព្រះអម្ចាស់ នោះមានការបង្ហូរនៃក្ដីមេត្តាករុណា ព្រះគុណ ព្រះចេស្ដា ហើយនិងកម្លាំង—ដែលទាំងនេះ សុទ្ធសឹងជាគុណតម្លៃយើងត្រូវការនៅក្នុងជីវិត ហើយនិងនៅក្នុងពិភពលោករបស់យើង។ ព្រះប្រទានដល់យើងនូវរាល់អ្វីៗដែលយើងត្រូវការតាមរយៈព្រះបន្ទូល ហើយនិងព្រះវិញ្ញាណរបស់ព្រះអង្គ ដើម្បីឱ្យយើងបានរស់នៅក្នុងអំណរដ៏ហូរហៀរ។ នៅពេលដែលយើងជ្រើសរើសក្ដីប៉ងប្រាថ្នារបស់ព្រះលើសពីចិត្តប៉ងចង់បានរបស់យើង ហើយព្យាយាមស្វះស្វែងឱ្យបានក្លាយដូចព្រះអង្គ នោះព្រះនឹងណែនាំ ហើយចង្អុលបង្ហាញផ្លូវដល់យើងជាក់ជាពុំខាន។

ការដើរតាមគម្រោងផែនការនៃព្រះ នោះប្រហែលជាពិបាកធ្វើជាងការប្រឹងស្ថិតនៅជាប់ជាមួយនឹងជំហានដ៏ងាយៗទាំង ៦ ដើម្បីឱ្យខ្លួនបានសម្រកគីឡូ ឬរបៀបទាំង ១០ នៃការកាត់បន្ថយភាពរប៉ាត់រប៉ាយនៅក្នុងផ្ទះរបស់ខ្លួន ទៅទៀត។ ប៉ុន្តែការដើរតាមព្រះ នោះនាំឱ្យយើងស្កប់ចិត្តនិងពេញដោយព្រះពរជាង។ នៅពេលដែលយើងបែរទៅរកព្រះជាម្ចាស់ ហើយកាន់ជីវិតរបស់យើងថ្វាយទៅព្រះ នោះព្រះអង្គអត់ឱនទោសដល់យើង ហើយផ្ដល់ដល់យើងនូវក្ដីសន្ដោសមេត្តារបស់ព្រះអង្គ។ ព្រះអង្គជួយប៉ះពារទំនាក់ទំនងដែលបាក់បែក ហើយបំពេញដួងចិត្តរបស់យើងជាមួយនឹងភាពសុចរិត ព្រះគុណ និងក្ដីសុខសាន្ដ។ ផលផ្លែល្អបានមកពីការដើរតាមព្រះជាម្ចាស់ ហើយនិងការអនុញ្ញាតឱ្យសេចក្ដីសុចរិតរបស់ព្រះអង្គណែនាំផ្លូវដល់ជំហានរបស់យើង។