Hoe is God? 'n 21-dag Leesplan

Oordenking

God Is Goed



Psalm 119 verklaar dat God goed is en wat Hy doen ook goed is (Psalm 119:67). Tog beleef almal dinge wat ons God se goedheid laat bevraagteken. 



Wanneer jy voor moeilike besluite of uitdagende omstandighede te staan kom, mag jy jouself dalk afvra: "As God goed is, hoekom laat Hy toe dat slegte dinge met my gebeur?" Dit is 'n natuurlike reaksie wanneer jou lewe onderstebo gekeer is. Dis moeilik om van 'n goeie Vader te sing wanneer jy siekte, onvrugbaarheid of werksverlies in die gesig staar. 



Die beste manier om twyfel oor God se goedheid uit die weg te ruim, is om die belangrikheid van perspektief te verstaan. Selfs God se Seun moes moeilike en pynlike dinge in die gesig staar terwyl Hy op aarde was. Hy is gemartel en het 'n pynlike, onregverdige dood verduur. Nietemin het Jesus se dood en opstanding ook vir ons die weg gebaan om met God versoen te word. Deur iets wat sleg voorgekom het, was God in staat om iets baie goed te doen.



Ons kan soms na pynlike tydperke terugkyk en sien hoe God dit uiteindelik ten goede laat meewerk het. Ander kere, sal jy nooit ten volle die doel van jou pyn hier op aarde verstaan nie.



Slegte goed gebeur in ons lewens en sal aanhou gebeur, solank as wat ons in 'n gebroke wêreld leef. Tog het Jesus gesê dat ons nie moet moed verloor nie, want Hy het die wêreld oorwin (Johannes 16:33). As ons 'n verhouding met Jesus het, het ons ook die hoop om vir ewig saam met God in die hemel te wees, ongeag die bose waarvoor ons in hierdie wêreld te staan kom.



Romeine 8:28 sê: "Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is." Ons kan vertrou dat God goed is, selfs wanneer ons omstandighede nie sin maak nie. Ons kan dinge nie soos God sien nie, maar ons kan vertrou dat vanuit sy perspektief al ons pyn tot iets goeds sal meewerk.



Oordink:




  • Watter omstandighede het veroorsaak dat jy God se goedheid bevraagteken?

  • Hoe word jou aannames oor God se goedheid beïnvloed as jy sy perspektief in ag neem?