20/20: God se Visie Vir My LeweVoorbeeld

Die Waarheid Oor Trane

Deur Rebecca Wilson

"Jesus het gehuil" Johannes 11:35.

Die tornado was vinnig en vernietigend. 'n Gesin het al hulle besittings verloor. Alhoewel daar nie lewensverlies was nie, het trane steeds gevloei.

Verskeie ander gesinne het die ondenkbare ervaar. Moord en chaos het vir hulle 'n werklikheid geword. Hulle het nou eerstehands begryp wat besering, dood en ondenkbare verlies beteken. Die trane het lank na daardie nag voortgeduur.

Huwelike wat deur egskeiding verskeur is, het seer, vrees, woede en teleurstelling opgelewer. Van die vrou, die man en die kinders af … was daar trane, baie trane.

Dan was daar individue wat op soveel maniere deur mishandeling, verwaarlosing, verwerping, en meer gewond is. Hulle het nie 'n maklike lewe gehad nie. Trane wat vroeër weggesteek, teruggehou en ontken is, is nou gestort.

Ek het oorkant baie mense gesit wat hierdie soort tragedies beleef het, en ons het saam gehuil. Soms, as daar net nie meer woorde was nie, het trane die diepte van wat onuitspreeklik was, beter uitgedruk.

In al hierdie omstandighede het ek 'n verrassende verskynsel oor trane opgemerk. Nie alle trane spruit uit hartseer nie. Soms bars daar 'n spontane gelag uit te midde van gesprekke oor die donkerste oomblikke … die soort gelag wat trane voortbring vanuit dieselfde diep plek binne ons, waar wanhoop woon.

Hierdie gelag en gehuil is nie histerie nie; dit is God se genesende krag. Prediker 3:4 sê: "Daar is 'n tyd om te huil en 'n tyd om te lag." Wie sou ooit kon dink dat beide gelyktydig kan gebeur?

In oomblikke van diepe hartseer is daar dikwels 'n onmiddellike terugkeer na wat in Psalms 126:5 belowe word: "Wie met trane saai, sal die oes met gejuig inbring." Dieselfde vreugde word ook aan ons in Psalm 30:5 beloof: “Waarlik, sy toorn duur net 'n oomblik, maar sy goedheid lewenslank. Gisteraand was daar nog trane en vanmôre lag ek al weer.”

Moenie my verkeerd verstaan nie. Ek sê nie hierdie omstandighede is snaaks nie. Ek sê dat God gereeld — wanneer jy dit die minste verwag — 'n vrystelling van vreugde uitstort wat beide toepaslik is en verligting bring. Dit kan binne sekondes gebeur.

Dawid het in Psalm 56:9 geskryf: “My ellende het nie ongemerk by U verbygegaan nie, U het op my trane gelet. In u boek staan hulle opgeteken.” Hierdie vers bevat 'n teenstrydigheid wat 'n verstommende waarheid openbaar. Die Hebreeuse grondwoord vir "ellende" is nuwd wat beide beteken "om te rou" en "om te spring van vreugde." Met ander woorde, jou trane wat voortspruit uit die diepste kamers van jou hart — hetsy weens hartseer of vreugde — word deur God getel. Hy hou elkeen in 'n bottel met jou naam daarop. Hy skryf oor elkeen in sy boek. Wat 'n verstommende waarheid … ons trane maak vir God saak!

Net soos ons die dinge wat vir ons kosbaar is, bewaar, so bewaar God wat vir Hom kosbaar is … ons trane. Of hulle nou weens droefheid gestort word of wanneer jy so baie lag dat jou liggaam pyn; elkeen is spesiaal en kosbaar vir Hom.

Dis so tragies dat ons grootword met leuens oor trane — leuens soos: "Jy is swak of emosioneel onstabiel as jy huil." "Ware mans huil nie." "Trane dien geen doel nie." "Skaam jou dat jy gehuil het." "Trane is vir babas." Hierdie leuens verhinder ons dikwels om die trane te stort wat vir ons genesing kan bring — trane wat God koester.

Dan is daar misleidende trane. Die vyand hou daarvan wanneer ons ons trane gebruik om ander te manipuleer. In Hosea 7:14 kry ons 'n idee hoe God oor trane voel wat vir manipulasie gebruik word: “Toe hulle na My om hulp geroep het, het dit nie uit die hart gekom nie, want hulle lê op hulle beddens en kerm en sny hulleself stukkend ter wille van koring en wyn. Hulle verset hulle teen My." Op grond van hierdie vers dink ek dit is veilig om te sê dat hierdie trane nie vir God behaag nie.

Dit is interessant dat diegene wat by die okkulte of satanisme betrokke is, nie mag huil nie. Hoekom? Omdat die Satan weet dat ons trane vir God belangrik is, doen die vyand alles in sy vermoë om dié ding onrein te maak wat genesing en reiniging in ons harte en siel bring.

Watter waarheid weet die vyand egter oor trane wat ons nie besef nie? Waarom is ons trane vir God so belangrik?

As ons die oorspronklike Hebreeuse grondwoord vir trane verstaan, openbaar dit aan ons waarom dit so belangrik is. Die Hebreeuse grondwoord wat vir "trane" gebruik word, hou verband met die proses waar drukking gebruik word om wyn uit druiwe of olyfolie uit olywe te maak. Met ander woorde, trane is die neweproduk van die druk wat op ons harte toegepas word. Net soos wyn voortspruit uit drukking wat op druiwe uitgeoefen word, laat ons harte trane vry wanneer ons druk ervaar.

Dit kom alles op ons harte neer. Dit hou 'n geweldige gevaar vir ons in om die natuurlike proses om trane te stort, te ontken of te onderdruk. As jou hart nie trane onder druk kan oplewer nie — hetsy in droefheid of vreugde — sal dit onverskillig en verhard raak.

God verwelkom ons trane, want Hy weet dat ons daardeur genesing ervaar. In werklikheid sê die Bybel vir ons dat Jesus self gehuil het toe Hy by die graf van sy vriend Lasarus gestaan het ​​(Johannes 11:35). Ook in die tuin van Getsemane voor sy kruisiging, was Jesus oorweldig deur hartseer oor dit wat vir Hom voorgelê het (Markus 14: 33–34; Lukas 22:44). As Jesus trane van droefheid moes stort, hoeveel te meer nie ons nie?

Vra jouself af hoe lanklaas jy trane van hartseer gestort het. Hoe lank gelede het jy gelag totdat jy gehuil het? Albei is verwant. As die een nie gebeur het nie, het die ander een waarskynlik ook nie! As nie een van die twee gereeld gebeur nie, loop jou hart die gevaar om verhard te word.

Hier is 'n gebed om die proses van trane te begin: "Here, luister asseblief na my hart. Hoor my huil. Ek wil hê U moet weet van die dinge waaroor my hart besorg is! Help my om u humor te hoor. Vul my met die vermoë om trane voort te bring weens die drukking in my hart. Vul my met u heilige teenwoordigheid en help my om alle dinge vanuit u perspektief te sien.”

Trane is 'n oppermagtige geneesmiddel. Dit is God se geneesmiddel — sy hoofkeuse vir ons genesing en reiniging. Aanvaar die waarheid oor trane en moet dit nie terughou nie. Bied dit eerder aan as 'n vorm van opoffering en aanbidding om sy bottel waarop jou naam staan, vol te maak.

Lag en trane se doel is om die wiele van dieselfde masjinerie van sensitiwiteit te laat draai; die een is windkrag en die ander waterkrag; dit is al.
~ Oliver Wendell Holmes

Memoriseervers

"Tog het hy óns lyding op hom geneem, óns siektes het hy gedra. Maar ons het hom beskou as een wat gestraf word, wat deur God geslaan en gepynig word. Oor óns oortredings is hy deurboor, oor óns sondes is hy verbrysel; die straf wat vir ons vrede moes bring, was op hom, deur sý wonde het daar vir ons genesing gekom" Jesaja 53: 4–5.