Mendime MëngjesiShembull

26 Shkurt

Shko dhe mos mëkato më.

Gjoni 8:11

Shiko sesi Krishti e manifeston neverinë e Tij ndaj mëkatit teksa njëkohësisht hedh mburojën e mëshirës së Tij mbi mëkataren. Zoti nuk e justifikon shkeljen e mëkatarit, edhe pse e shfajëson personin mëkatar. Në çështjen e madhe të shpëtimit, drejtësimit dhe shenjtërimit, falja dhe shenjtëria në thelb janë të lidhura në mënyrë të pandashme. Kur Zoti Jezus e nis mëkatarin me një ndjesi shfajësimi në ndërgjegjen e tij, kjo gjithmonë shoqërohet me nxitjen më të fortë nga të gjitha: “Mos mëkato më.”. Ndërsa mëkatari del nga prania e Jezusit i falur, i drejtësuar e i shpëtuar, duket sikur fjalët e buta të Shpëtimtarit që nënshtrojnë shpirtin tingëllojnë në veshët e tij në çdo hap përgjatë shtegut që ka përpara. “Shko, admiro dhe shpalle kudo lavdinë e atij hiri që ka bërë gjëra kaq të mëdha për ty. Shko dhe përhape famën e Tij dhe, me frymën tënde të fundit, qëndro në emrin e Atij, i Cili, kur mëkati, Satani dhe ndërgjegjja të akuzonin dhe do të të kishin hedhur në mjerimin e përjetshëm, në atë çast të doli Mik, Avokat dhe Shpëtimtar. Shko dhe, kur të tundohesh që ta lëndosh sërish gjirin që të strehoi, më kujto Mua; nga Gjetsemania, nga Kalvari dhe nga vendi i shenjtëruar ku të thashë: Unë nuk të dënoj. Shko dhe mos mëkato më.”