kykNET Lydenstydgids 2025: In die Skadu van GetsemaneSample

oudergewoonte ...

saai 'n gedagte

oes 'n aksie

saai 'n daad

oes 'n gewoonte

saai 'n gewoonte

oes 'n karakter

saai 'n karakter

oes 'n lewenslot

– Ralph Waldo Emerson

(vrye Afrikaanse vertaling)

En Hy het vertrek en volgens gewoonte na die Olyfberg gegaan. En ook sy dissipels het Hom gevolg. En toe Hy op die plek kom, sê Hy vir hulle: Bid dat julle nie in versoeking kom nie. En Hy het Hom van hulle afgesonder omtrent so ver as 'n mens met 'n klip kan gooi, en neergekniel en gebid en gesê: Vader, as U tog maar hierdie beker van My wil wegneem! Laat nogtans nie my wil nie, maar u wil geskied! En 'n engel uit die hemel het aan Hom verskyn en Hom versterk. En toe Hy in 'n sware stryd kom, het Hy met groter inspanning gebid, en sy sweet het geword soos bloeddruppels wat op die grond val. Toe staan Hy van die gebed op en kom by sy dissipels en vind hulle aan die slaap van droefheid. En Hy sê vir hulle: Wat slaap julle? Staan op en bid, dat julle nie in versoeking kom nie. Lukas 22: 39-46

• My reis tydens Lydenstyd begin deur Jesus te volg, en ook sy gewoonte om na ‘n plek te gaan om te waak en te bid.
• Om Hom en sy gewoontes te wil volg, moet ek eers dink dat Hy en die lewe wat Hy lei wonderlik is. As ek besef dat sy lewe, en nie net wat Hy geleer het en die feit dat Hy gesterf het belangrik is nie, maar ook hoe Hy geleef het (Romeine 5:10), sal ek Hom wil volg.
• Sy gewoontes bring my in kontak met die krag van gewoontes en met my eie gewoontes.
• Ek word na ‘n plek geneem waar ek ‘n diep begeerte kry om soos Hy te lewe, maar ek besef ek sal dit nie self kan regkry nie — hy sal my moet help.

Gebed: Ek vra vir ‘n diep bewussyn van u liefde en werk in my lewe.