Бүх зовнилоо хаяЗагвар

Бурханы жигүүр дор

Өөрийн майханд намайг мөнхөд суулгаач. Таны жигүүрийн дор намайг хоргодуулаач. - Дуулал 61:4

Манай орон сууцны ойролцоох цөөрөмд дэгдээхэйтэй Канад галууны хэд хэдэн гэр бүл байдаг. Бяцхан дэгдээхэйнүүд нь дэндүү сэвсгэр, үнэхээр өхөөрдөм тул цөөрмийн эргэн тойронд би алхах юм уу гүйх үедээ тэднийг харалгүй өнгөрч чаддаггүй байв. Гэхдээ би тэдэнтэй харц тулахаас зайлсхийж, галууг тааваараа байлгахыг сурч авсан, эс бөгөөс би галууны эцэг эхэд аюул заналхийлэл болж, тэд миний араас исгэрч, хөөх эрсдэлтэй!

Бурханы хүүхдүүдээ хайрлах дөлгөөн, хамгаалагч хайрыг Бичээст дүрслэхийн тулд дэгдээхэйгээ хамгаалж буй шувууны дүр төрхийг дүрсэлсэн байдаг (Дуулал 91:4). Дуулал 61-д Давид Бурханы анхаарал халамжийг дахин нэг удаа мэдрэх гэж хичээж байгаа мэт харагддаг. Тэрээр Бурханыг өөрийн “хоргодох газар, бат бөх цамхаг” (эш 3) хэмээн мэдэрсэн боловч одоо “дэлхийн хязгаараас” цөхрөнгөө барж, “Надаас өндөр хадан тийш намайг хөтлөөч” хэмээн гуйж байна (эш 2). Тэрээр дахин нэг удаа “[Бурханы] жигүүрийн дор намайг хоргодуулаач” (эш 4) гэж хүсжээ.

Мөн Давид өөрийн зовлон шаналал, эдгэрэх хүслээ Бурханд авчрахдаа Түүнийг сонссон гэдгийг мэдээд тайвширсан (эш 5). Бурханы итгэмжит байдлын улмаас тэрээр “[Түүний] нэрийг мөнхөд магтан дуулна” (эш 8) гэдгээ мэдэж байсан.

Дуулалыг бичигчийн нэгэн адил бид Бурханы хайраас холдсоноо мэдрэх үедээ Түүний тэвэр рүү эргэн гүйж, биднийг өвдөж байсан ч гэсэн Тэр бидэнтэй хамт байж, эх шувуу дэгдээхэйгээ хамгаалдаг шиг биднийг хамгаалж, халамжилдаг гэдэгт итгэлтэй байж чадна.

Моника Ла Роуз

Бурхан минь, намайг гэсэн хүчтэй, хамгаалдаг хайранд тань баярлалаа. Таны энхрий халамжид аюулгүй амрахад минь туслаач.