Lewe: Is Dit Al?Voorbeeld

Vuil Voete en Goddelikheid 

Wat is jou droomberoep? 

Wil jy 'n YouTube sensasie wees? Professionele atleet? Dokter? 'n Marinebioloog of 'n vlieënier? Wat van speletjies speel vir 'n lewe? Wat van die persoon wat mense op lughawens of sportvelde vervoer? 

Daar was 'n werk in Jesus se tyd wat geen voorligtingsbeampte ooit vir 'n uitblinker-student sou voorstel nie; 'n werk wat gereserveer was vir diegene wat heel onder op die sosiale statusleer was. 

Hierdie werk was nie 'n droomberoep nie. Dit was meer soos 'n nagmerrie. 

In Jesus se tyd het mense sandale met oop tone gedra, die strate was vuil, stowwerig en diere se mis sou saamkoek op die sole van uitgeputte reisigers. Omdat hulle voete so vuil was, moes iemand die gaste se voete was wanneer hulle tuisgekom het. Dit was nie 'n aangename werk nie, en net die slaaf met die laagste rang in die huishouding sou verplig wees om dit te doen. 

Dit is wat hierdie verhaal so skokkend maak. Jesus — die Seun van God en die Here van alles — het hierdie taak vrywillig op Homself geneem! 

Waarom?

Kyk na die eerste vers: "... Hy het sy eie mense wat in die wêreld is, liefgehad, Hy het hulle tot die uiterste toe liefgehad" (Johannes 13:1).

Jy sien liefde is meer as net "gevoelens."

Liefde is 'n aksie.

Liefde is 'n keuse. 

Liefde is meer as woorde; liefde is die passie wat jou dwing om ander mense te soek en te dien. 

Wanneer ons aan liefde dink, is ons geneig om aan wonderlike romantiese gebare te dink. Jy weet, dinge soos teksboodskappe wat elegant geskryf is met heelwat lieftallige emoji's, of spoggerige uitnodigings na die matriekafskeid wat vinnig op sosiale media versprei.

Ware liefde is dikwels nie betowerend en verleidelik nie. Om die waarheid te sê, of liefde opreg is of nie, word gewoonlik in die alledaagse lewe bewys; in die besonderhede en eentonigheid van daaglikse gebeure, in die klein, bestendige dade van vriendelikheid wanneer ons 'n ander persoon se behoeftes belangriker as ons eie beskou. 

Ons sien dit in die karakter van Jesus. 

Jesus se liefde het Hom gelei om vrywillig die rol van die onbelangrikste slaaf in te neem; Hy het die stof en droë vullis van sy dissipels se voete afgewas. Selfs meer merkwaardig, Hy het die voete van Judas gewas, wat Hom binnekort sou verraai. 

Jesus doen dit as 'n voorbeeld vir ons. "Ek het vir julle 'n voorbeeld gestel, en soos Ek vir julle gedoen het, moet julle ook doen" (Johannes 13:15).

Om Jesus te volg, gaan nie oor status in die oë van die wêreld nie. Die Christelike lewe gaan daaroor om jouself in liefde aan ander mense toe te wy; alles in reaksie op wat Jesus vir ons gedoen het.

Ware lewe word daarin gevind om ander lief te hê soos ons ook liefde ontvang het. 

Wanneer jy aan jou hoërskool of verby die grense van die wêreld dink, onthou dat Jesus ons nie geroep het om iets aan alles te doen nie. Hy nooi ons wel uit om iets te doen. Of, beter gestel, Jesus roep ons om iets te doen as diens aan iemand, want dit is wat liefde doen. 

Wat is jou "iets"? 

Wie is die "iemand" na wie jy geroep word om te dien?