Daar Staan GeskryweVoorbeeld

Vernietig Vestings

deur Marcus Brecheen

'n Paar jaar gelede het ek 'n Bybelklas aangebied toe een van daardie wilde Texas storms van die weste af aangewaai kom. My vrou was tuis met ons kinders en die waarskuwingsirene het afgegaan, wat aangekondig het dat daar 'n tornado in die omgewing is. Sy het die weerkanaal aangeskakel en die kaart het aangetoon dat die tornado in ons buurt was. Sy en die kinders het na die veiligste kamer in ons huis gegaan. Hulle was omtrent 15 minute daar toe my seun, Seth, net mooi genoeg gehad het. Hy het opgestaan en sy vinger in die lug gesteek en gesê: "Vader, ek beveel U, in die Naam van Jesus, neem die tornado weg!"

Na daardie insident het ons hom natuurlik mooi laat verstaan wie eintlik in beheer is. Ek dink tog God hou van die mannemoed van iemand wat sal opstaan en sê: "Ek het nou genoeg gehad! Daar staan geskrywe!" Hoekom ek so dink, is omdat die Woord van God dikwels in die Skrif met 'n geveg geassosieer word.

Paulus praat in 2 Korintiërs 10:3-5 van 'n geestelike oorlog en hy wys vir ons dat die Woord van God argumente en vestings kan vernietig. 'n Vesting word beskryf as enigiets wat teen die wil van God is, en ook wat jy glo, onveranderlik is. Indien daar dus 'n situasie in jou lewe is wat jy weet God nie goedkeur nie, maar wat jy dink nooit sal verander nie, dan is dit 'n vesting. Die Woord van God kan dit vernietig.

Baie kere kom die vyand in met die krag van voorstelle, voer leuens aan ons soos: " Ek dink nie my huwelik gaan uitwerk nie," of "My besigheid gaan vou." Aan die einde van die bogenoemde Skrifgedeelte het ons gelees dat Paulus vir ons sê om daardie gedagtes gevange te neem en dit aan Christus gehoorsaam te maak (2 Korintiërs 10:5). Die enigste manier hoe ons die vyand se argumente kan afbreek, is om die Woord van God in ons lewens te verklaar.

Het jy geweet dat die Woord bedoel is om gehoor én gelees te word? As jy tyd deurgebring het om die Woord te bestudeer, ken jy dit en jy kan jouself vra: "Wat sê die Bybel hieroor?" Wanneer jy dit kan doen, word daardie verse en Skrifgedeeltes wat hardop uitgespreek word, 'n magtige swaard teen die vyand.

Gebed

Vader, dankie dat U my vandag so 'n sterk swaard soos u Woord gegee het. Gee my vandag moed en wysheid. Leer my hoe om die Woord van God in my omstandighede te gebruik en gee my 'n hernude passie vir u Woord. Ek ontvang dit in geloof. In die Naam van Jesus. Amen.

Geheuevers

"Die woord van God is lewend en kragtig. Dit is skerper as enige swaard met twee snykante en dring deur selfs tot die skeiding van siel en gees en van gewrigte en murg. Dit beoordeel die bedoelings en gedagtes van die hart" Hebreërs 4:12.