Daar Staan GeskryweVoorbeeld

Maak Jou Geestelik Oë Oop

deur Robert Morris

'n Paar jaar gelede het ek by 'n kerk gepreek. Toe ek terugkom by my hotelkamer, het ek die TV aangeskakel op 'n Christen televisie kanaal. 'n Man het oor Markus 8 gepreek. In daardie Skrifgedeelte het Jesus klei met speeksel aangemaak, op 'n man se oë gesmeer en gevra: "Sien jy al iets?" Die man sê toe: "Ek sien mense, iets soos bome. Ek sien hulle loop." Jesus het die man toe weer aangeraak en hy is genees. Die TV prediker het gesê: "Sien julle, selfs met Jesus het dit nie altyd die eerste keer gewerk nie." Ek kon nie glo dat hy dit kon sê nie! Ek het dus gaan uitvind wat daardie vers beteken. Ek het tot eenuur in die nag navorsing gedoen en toe hoor ek die Here sê: "Hoekom vra jy nie vir My wat dit beteken nie?" Voordat ek nog kon vra, het die Here dit aan my begin geopenbaar. Die feit was dat dit nie die eerste keer gewerk het nie. Die rede was: voor Hy die man se natuurlike oë oopgemaak het, het Hy sy geestelike oë oopgemaak.

Om dit in konteks te plaas, kom ons kyk wat net voor hierdie verhaal in Markus 8 gebeur het. Jesus het so pas 4 000 mense kos gegee met slegs sewe brode. Die Fariseërs kom toe na Hom en sê: "Gee ons 'n wonderteken." Jesus het seker gedink: Was julle dan nie hier tydens middagete nie? Praat van geestelike blindheid! Dit het egter voortgegaan toe Jesus en sy dissipels in 'n boot geklim het. Die dissipels het vergeet om brood te bring en toe Jesus sê: "Pas op, wees op julle hoede vir die suurdeeg van die Fariseërs," het hulle gedink Hy was vies omdat daar geen brood was nie. Dink jy dat Jesus, wat so pas 4 000 mense kos gegee het met sewe brode, bekommerd was omdat daar nie brood was nie? Hy het nie oor regte brood gepraat nie. Hy het vir hulle gesê dat hulle nie verstaan waaroor Hy praat nie omdat hulle oë het maar nie sien nie. Net toe hulle uit die boot klim, het Jesus die blinde man genees. Sien jy die simboliek hier?

Dalk dink jy Jesus moet jou geestelike oë ook oopmaak. Die Bybel sê daar is 'n sluier oor ons oë, totdat ons begin glo. Selfs daarna moet ons oppas vir trots. As jy die Bybel lees en dink jy weet al alles, sal jy niks raaksien nie. Dit was nie totdat ek God gevra het om vir my die betekenis van die verhaaltjie te gee nie, dat ek verstaan het. As jy jou Bybel neem en bid: "Here, ek is blind sonder U. Ek kan nie die Bybel verstaan as U dit nie vir my duidelik maak nie," dan sal Hy jou geestelike oë oopmaak en dinge sal vir jou duidelik begin word.

Gebed

Vader, ek kan nie werklik sonder U sien of hoor nie. Ek wil vandag my geestelike sig ontvang. Ek wil u woorde in die Bybel duidelik verstaan. Help my om dinge in die Skrif raak te sien wat ek nie voorheen gesien het nie. Ek wil graag hê dat U met my deur u Woord sal praat aangaande my werk, loopbaan, gesin, huwelik en lewe. Ek wil volgens die Woord van God leef, nie van natuurlike brood alleen nie.

Geheuevers

"U woord is die lamp wat my die weg wys, die lig op my pad" Psalm 119:105.