Daar Staan GeskryweVoorbeeld

Vind Vryheid

deur Marcus Brecheen

Terwyl ek grootgeword het, is ek geleer dat ek my redding ten minste 30 tot 40 keer op 'n dag kon verloor. Ek is grootgemaak om te dink dat ek perfek moes wees om hemel toe te kon gaan. My grootste vrees was dat ek voor God sou staan met sonde in my lewe. As gevolg van my pogings om 'n perfekte lewe te lei, was ek eintlik in slawerny. Ek sou myself gedurig afvra: "Is daar nou iets waaroor ek belydenis moet doen?" As ek aan niks kon dink nie, het ek aangeneem dat ek belydenis van trots moes doen. Dit was hoe my godsdiens elke dag in my lewe afgespeel het en dit was eerder 'n stryd as 'n lewenswyse. Dit was eers jare later dat die stryd geëindig het, en dit was die Woord van God wat die oorwinning bewerkstellig het. Jy sien, die Woord van God kan lewend en aktief in ons lewens wees en ons het dit nodig vir die stryd wat in ons binneste plaasvind.

Toe God ons geskep het, het Hy ons na sy beeld gemaak, met 'n gees, siel en liggaam — en net een van daardie drie kan in beheer wees. Adam en Eva was deur hulle gees gelei omdat hulle gedurig met God gekommunikeer het. Nadat hulle egter gesondig het, was hulle deur hulle siele beheer. Dis hoe ons ook in hierdie wêreld ingekom het, onder beheer van ons siele, wat uit ons denke, wil en emosies bestaan. In wese het ons die kennis van wat goed is, sonder die krag om dit te doen, en die kennis van wat boos is, sonder die krag om dit te vermy. Ons siele is in beheer. Gelukkig het iemand die Woord van God met ons gedeel — Romeine 10:17 sê: "Die geloof kom dus deur die prediking wat 'n mens hoor, en die prediking wat ons hoor, is die verkondiging van Christus" — en ons het die vermoë om met God te kommunikeer.

Daar is egter 'n probleem. Ons word deur ons siele beheer, totdat ons ons lewens vir God gee — dit kan 20, 30 of 40 jaar neem — eers dan word die gees in ons lewendig en kan ons sê: "Ek wil hê dat God my lewe beheer." Die siel sê: "Op geen manier nie", en dis waar die stryd begin. Die goeie nuus is dat die Woord van God kom om ons vry te maak van die beheer van ons siel en kom hervestig die orde van hoe God wil hê ons moet leef. Wanneer die stryd tussen ons siel en gees aan die gang is, moet ons na die Woord van God gaan — dis 'n skerp wapen wat vryheid meebring.

Gebed

Vader, dankie dat U toelaat dat ek u Woord kan hoor. Dankie vir die vermoë om elke dag met U te kan kommunikeer. Gee my nie net die kennis van dit wat goed is en die krag om dit te doen nie, maar ook die kennis van wat boos is en die krag om dit te vermy. Laat toe dat my gees in beheer van my lewe is. In die Naam van Jesus. Amen.

Geheuevers

"Die woord van God is lewend en kragtig. Dit is skerper as enige swaard met twee snykante en dring deur selfs tot die skeiding van siel en gees en van gewrigte en murg. Dit beoordeel die bedoelings en gedagtes van die hart" Hebreërs 4:12.