Daar Staan GeskryweVoorbeeld

Reg Voor Jou Oë

deur Robert Morris

Ek dink dis moontlik dat vrouens beter kan sien as mans. Kom ek gee vir jou 'n voorbeeld. Nou die dag vra ek vir my vrou: "Skat, het jy my blou hemp gesien?" Sy sê toe dit is in my kas. Ek het geweet dis nie daar nie, maar het weer gaan seker maak, want ek wou nie weer haar hulp vra nie. Ek het deur elke hemp geblaai en toe ek klaar was, sê ek: "Skat, dis nie in my kas nie." Ek is seker jy weet wat toe gebeur het. Sy het ingestap, na die hemp gewys en gesê: "Dis net hier." Ek het oë gehad, maar ek kon nie sien nie.

Dis nou 'n grappige uitkyk op 'n tema wat regdeur die Bybel strek. Jesus verwys dikwels na mense wat wel kan sien en hoor, as blind en doof. Daar is baie verse wat hierdie tema het. Kyk byvoorbeeld na Jesaja 42:18: "Luister, julle dowes, kyk, julle blindes, dat julle kan sien." Dis vreemd om vir dowe mense te sê hulle moet luister. Hy praat egter nie van fisieke doofheid nie; hy praat van geestelike doofheid. Die punt wat hy maak is dat ons die vermoë moet hê om dinge op 'n geestelike vlak te sien en te hoor. Het jy al ooit 'n hoofstuk in die Bybel gelees en besef jy het geen idee waarvan dit praat nie? Met ander woorde, jy sien met jou fisieke oë maar jou geestelike oë is toe.

Stel jou dit voor: jy is in die kerk, jy kyk op en sien dat iemand na jou staar; jy waai, maar hulle waai nie terug nie. Jy dink dalk: Wat gaan met hulle aan? Die waarheid is egter dat hulle dagdroom en jou nie raaksien nie. Ons kan nie bekostig om op geestelike vlak te dagdroom nie. Ons moet ons geestelike oë oophou sodat ons werklik kan sien wat gebeur.

Is dit moontlik om die Bybel te lees en te dink: "Ek begryp dit nie", al staar dit jou in die gesig? Absoluut. Ons moet besef dat ons blind is sonder God. Hy is die outeur van hierdie boek en net Hy kan ons help om dit te verstaan. Vra Hom om vir jou die oë te gee om te sien en die wysheid om te verstaan.

Gebed

Vader, dankie dat U vir my die vermoë gee om u Woord te hoor. Help my om die Skrif te verstaan sodat ek ten volle kan hoor en sien wat U vir my sê. Help my om op U gefokus te bly. In die Naam van Jesus. Amen.

Geheuevers

"Die woord van God is lewend en kragtig. Dit is skerper as enige swaard met twee snykante en dring deur selfs tot die skeiding van siel en gees en van gewrigte en murg. Dit beoordeel die bedoelings en gedagtes van die hart" Hebreërs 4:12.