Rick Warren se Daaglikse OordenkingsVoorbeeld

Net God gee finansiële sekuriteit

Terwyl jy jou tydperk van geestelike groei ingaan, is dit belangrik om God met jou finansies te vertrou. As jy wil hê dat God jou finansieel moet seën, moet jy gefokus bly op die waarheid dat Hy die bron van jou finansies is en die Een is wat in jou behoeftes voorsien.

Wat beteken dit? Dit beteken dat my werkgewer nie my sekuriteit is nie. My spaargeld is nie my sekuriteit nie. Niemand en niks anders, behalwe God, voorsien in my behoeftes nie.

Kom ek verduidelik dit só: Wanneer ek die kraan oopdraai, dink ek nie dat die water van die kraan af kom nie. Ek weet die water kom eintlik van die opgaardam af. Dit loop net deur die kraan.

Op dieselfde manier kom die inkomste wat God vir jou wil gee dalk deur 'n werk, of op 'n ander manier. Tog is God die bron daarvan.

Dit beteken jy hoef jou nie te bekommer oor watter kraan Hy gaan gebruik om in jou behoeftes te voorsien nie. Eintlik sê Hy: "As ek hierdie kraan toedraai, kan ek maklik 'n ander een oopdraai. As jy hierdie werk verloor, kan Ek vir jou 'n ander een gee. Ek is jou bron, nie jou werk nie. Ek is jou bron, nie jou bankrekening nie."