Gewilde Bybelverse vanaf Mateo 5

Deel

Kek rhačell i momeli an oun čivell lat tel i piri. Na-a, yob čivell lat ap i momelengri, te vell koy momeli diklo hakenestar, kay an o kheer hi. Yaake hounte venn t'mer har i momeli, hoy rhačell glan i menshende, te dikenn le, havo lačo koova t'mer lauter krenna, oun te sharenn le o Debles, kay hi t'maro dad an o bolepen.

T'mer han i momeli ap kay phoub. Oun i foro, hoy pral ap i berga hi, nay ačell gar khatedo.

Barhtele hi kolla, kay hi len i djoudjo dji. Yon dikenn o Debles pengre yakentsa.

Barhtele hi kolla, kay kanna pal o čačepen bokenna oun troushenna. O Devel krell len čalo.

Me penau t'menge: Avenn lačes kolenge, kay hi čilačo ap t'mende! Mangenn o Debles kolenge, kay lenn t'men palla!

Barhtele hi kolla, kay djinenna, kay hi le čorvelo glan o Debleste. Yon djivenna o Debleha khetne an o bolepen oun lenn leskro bravlepen.

Barhtele hi kolla, kay krenna, te vell kek čingepen mank i menshende. O Devel kharell len peskre čave.

Barhtele hi kolla, kay kanna rovenna. O Devel lell lengri douk dran lengro dji.

Kolla, kay krenn, hoy o Devel kamella, oun doleske lenn len i menshe palla, kolla hi barhtelo! Yon djivenna o Debleha khetne an o bolepen.

Barhtele hi kolla, kay hi len i baro dji i vavar menshenge. O Debles hi i baro dji lenge.

T'mer patsenn ap mande. Doleske praasenn le t'men, lenn t'men palla, oun rakrenn rhorhene čilače laba pral t'mende. Te krenn le kova, avenn barhtele! Givenn oun denn gole i barhtyatar ap ko dives! O Devel dell t'men i baro bravlepen an o bolepen. Yaake har yon t'men palla lenna, yaake lan le o Debleskre rakepangren an o phouro tsiro ninna palla.

Barhtele hi kolla, kay kek čingepen krenna. O Devel dell len i tseli phoub.

T'mer han o loon ap kay phoub. Te nashras o loon peskri zoor, hi lo bouder gar mishto. Oun tou nay kreh bouder či, te vell lo pale londo. Ko loon molell či bouder. Tou nay vitsreh les toutar. Oun i menshe stakrenn les khetne.

T'mer hounte venn yaake lačes ap i menshende, har t'maro dad an o bolepen hi lačes ap i menshende.

Te penenn t'mer: Ava! yaake hounte vell kova ninna: Ava! Oun te penenn t'mer: Na-a! yaake hounte vell kova ninna: Na-a! Hako lab, hoy pral vergel hi, vell o bengestar.

T'mer djinenna, kay vas glan i rah tsiro ap i phourende penlo: Koon doukrell i vavares, koleske kress, har yob kras oun gar boudeder: Te doukras lo i vavareskro yak, palle douke leskro yek yak kokres. Te doukras lo i vavareskro dand, palle douke leskro yek dand kokres. Me penau t'menge: Ma hadenn t'maro vast ap koleste, kay kras t'men čilačo koova! Te das touke yek ap i čači čam, koleske rike ninna i servi koy, te dell lo tout!

Te kamell tiro yak čomone te dikell, hoy anell tout ap i čilačo drom, palle čin les vin, oun vitse les toutar! Hi touke feteder, te nashress yek yak, har te vess an o bengeskri yag vitsedo. Oun te kamell tiro čačo vast, te kress i čilačo koova, palle de les tele, oun vitse les toutar! Hi touke feteder, te nashress tou yek vast, har te djas an o bengeskri yag.