Is daar enige manier waarop jy God se straf kan ontvlug en in sy guns kan kom? — 1 Timoteus 4:10

Paulus fokus in hoofstuk vier op Timoteus se bediening in die gemeente. Sy hoofopdrag is om die gemeente te help om sy funksie as draer en beskermer van die waarheid te kan vervul.

1. Wat sê dit vir jou eie gemeente en jou rol in die beskerming van die waarheid?

Om dit goed te kan doen, moet Timoteus nougeset let op sy eie leer en lewe, sodat hy self in totale toewyding aan die Here kan leef. Sy toewyding aan die Here moet gestempel word deur die hoop wat hy koester op die lewende God wat hom sal verlos.

2. Wat dink jy bedoel Paulus dat hy moet “swoeg” en “veg” daarvoor? Watter rol speel die hoop in jou
eie stryd?

3. Lees die verse later vandag weer om jou te herinner aan die onvervreembare rol wat ook jy speel in die beskerming van die waarheid. Wy jou aan die stryd in die hoop op God wat voorloop daarin.

4. Jy kan later vanaand die gedeelte weer lees in die konteks van 1 Timoteus 3:14-4:16 met die tema: Die gemeente as draer en beskermer van die waarheid.