Hoop wat kaalvoet loopSample

“Die stem vol hoop … ”

Dit was ’n gewone duif wat ’n waterskeidingsrol in Noag se lewe gespeel het. Noag moes weet wanneer dit veilig is om die ark te verlaat en stuur daarom drie maal ’n duif op die verkenningstog uit. Die eerste keer moes die duif omdraai omdat hy nêrens staanplek op die watermassas kon kry nie. Die tweede keer kom hy terug met ’n olyfblaartakkie … vol hoop. ’n Week later verander hierdie hoop in ’n vaste fondament toe hy uiteindelik sy wêreldse tuiste tussen die takke van die bome vind. Toe weet Noag dat die tyd amper reg is.

Die Goddelike Duif – die Gees van God – praat vandag steeds met ons:

Soms sê Hy: “Wees geduldig. Op die régte tyd sal jy antwoorde en ’n uitkoms kry.”

Ander kere fluister Hy: “Ek wil jou seën met die olyftakkies van die lewe. Vind rus op die plek waar jy nóú is.”

En dan is daar dié kere wat die Gees die groen lig gee: “Doen wat Ek vra. Die tyd is reg.”

GEDAGTE VIR DIE DAG: Wat sê die Heilige Gees vandag vir jou?

GEBED: Praat met my, Here. Ek luister. En ek sal doen. Amen.

Hierdie oordenking is geneem uit HOOP WAT KAALVOET LOOP deur Milanie Vosloo © Christelike Uitgewersmaatskappy.