Yohana 16
16
1Amakhuwa kano emubooleele, mbu muleshe okhwisichirasibwa. 2Balamurusia mutsisinagogi; toto, eshise shili okhwitsa olwa omundu yesi oumwira inywe alakaala mbu amukhalabanila Nyasaye. 3Namakhuwa ako balakhola shichila shibamumanya Papa kata isie ta. 4Ne amakhuwa kano emubooleele, mbu olwa eshise shiabwe shiba nishiulile, mukeetsulile, shinga olwa ndamuboolela.
Ne amakhuwa kano shindamuboolela okhurula khukhuchaaka ta, shichila ndali nineenywe. 5Ne bulaano enzia khu oyo owaruma; nabulaho mwinywe oureeba, mbu Otsia heena? 6Ne okhuba emubooleele amakhuwa kano, eshibeela shiitsuule mumioyo chieenywe. 7Nebutswa emuboolela akatoto, mbu kamukhoyeele mbu nzinyoshe; okhuba nimba nindeenyokha ta, Omuhabini shialamwitsila tawe; ne nimba ninzia, ndalamuruma khwinywe. 8Naye olwa alaba niyeetsile alahula eshialo mushiina khumakhuwa kobwonooni, nende akobulunjishi, nende akobukhalachi. 9Akobwonooni, shichila shiba'suubilila ta; 10akobulunjishi, shichila enzia ewaPapa, neenyu shimulandola khandi ta; 11akobukhalachi, shichila omukhulundu weshialo shino amalile okhukhalachilwa eshiina.
12Eshili nende amakhuwa amanji okhumuboolela, ne shimukanyala bulaano tawe. 13Nebutswa olwa ye, niye Roho wobwatoto, alaba niyeetsile, alamwibaalila mubwatoto bwosi; okhuba shialasunga khukeke omwene ta; ne akeenako kosi aka alahulilanga, niko aka alaboolanga; khandi alamurumbulila amakhuwa akeetsa okhwitsa. 14Alambeelesia oluyali; okhuba alabukula khukanje, nakarumbulila inywe. 15Kosi aka Papa ali ninako, nakanje; niko akachila nimboola mbu abukulanga khukanje, nakarumbulila inywe.
Eshibeela okhukalulwa okhwikhoya
16Neshise eshitiiti butswa, mana shimulandola khandi ta; khandi neshise shindi eshitiiti, mana mulandola. 17Kho abandi abokhubeechibe nibareebana, bari Namakhuwa shiina kano aka akhuboolelanga, mbu Neshise eshitiiti butswa, nimurandola ta; khandi neshise shindi eshitiiti, mana mulandola; khandi mbu Shichila enzia khuPapa? 18Kho nibareeba bari Nelikhuwa shiina lino elia aboolanga, mbu Eshise eshitiiti? Shikhumanyile elia aboola ta. 19Yesu yalola shinga olwa beenya okhumureeba, nabasunjila ari Mureebananga khwikhuwa elo elia emboolile, mbu Neshise eshitiiti butswa, mana nimurandola ta; khandi neshise shindi eshitiiti, mana mulandola? 20Toto mwene, emusunjila mbu mulalila nimwikhuula, nashio eshialo shileekhoya; mulabeelela, ne eshibeela shieenywe shilakalulwa okhwikhoya. 21Omukhasi olwa alumwa okhwibula aba neshibeela, shichila eshiseshie shiulilene olwa aba namalile okhwibula omwana, shiyeetsulila amanyakhano ako khandi ta, khulwa okhwikhoyela omundu owibuulwe mushialo. 22Niko akachila inywe nimuli neshibeela bulaano; ne ndakhamulole khandi, mana emioyo chieenywe chiakheekhoye, ne abulaho oulamubukula okhwikhoya khweenywe. 23Kata khunyanga eyo shimula'reeba likhuwa liosi ta. Toto mwene, emusunjila mbu nimuba nimusaaya Papa likhuwa liosi, alamuheelesia muliira lianje. 24Okhuula bulaano mushili okhusaaya likhuwa liosi muliira lianje; sabe, ne mulanyoola, mbu okhwikhoya khweenywe khwitsule.
Isie emalile okhuhula eshialo
25Amakhuwa kano emubooleele munjelo; eshise shili okhwitsa olwa ndaramuboolela munjelo khandi ta, ne ndalamuboolela habulafu akaPapa. 26Khunyanga eyo mulasaaya muliira lianje; nasi shimuboolela mbu ndalasaaya Papa khulweenywe ta; 27okhuba Papa omwene amuheelanga, shichila mwayaheelile isie, nimusuubila shinga olwa ndarula khuPapa. 28Ndarula ewaPapa, ninzitsa mushialo; khandi ndalalekha eshialo, ninzia ewa Papa.
29Abeechibe nibasunga bari Lola, bulaano oboolanga habulafu, noraboola oluchelo lwosi ta. 30Bulaano khumalile okhumanya mbu iwe wamanya amakhuwa kosi, kata shikakhoyeele mbu omundu yesi akhureebekhwo ta; niko akachila nikhusuubila mbu khane warula ewaNyasaye. 31Yesu nabakalusia mbu Kho bulaano mwakhasuubila? 32Lole, eshise shili okhwitsa, toto, shimalile okhuula, olwa mulaba nimusalaanile, buli mundu natsiile ewabwe, nimundekha isie sienyene; nebutswa shindi sienyene ta, shichila Papa ali ninasi. 33Amakhuwa kano emubooleele, mbu mwisie mube nomulembe. Mushialo muli nende amasila; ne leme emioyo; isie emalile okhuhula eshialo.
ទើបបានជ្រើសរើសហើយ៖
Yohana 16: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
