Yohana 15
15
Yesu niye omutsabibu kwatoto
1Isie nisie omutsabibu kwatoto, naye Papa niye omulimili. 2Buli lisaka mwisie eliraama ebiamo ta, aliyinaiho; ne buli lisaka eliamanga ebiamo, alikhalila, mbu limeete okhwama ebiamo. 3Ne bulaano mumalile okhusiiyikha khulwa likhuwa elia emubooleele. 4Menyenje mwisie, ninasie mwinywe. Shinga lisaka olwa liranyala okhwama ebiamo khubwalio, harali okhumenya khumutsabibu ta, nilwo olwa muranyala murio inywe harali okhumenya mwisie tawe. 5Isie nisie omutsabibu, neenyu muli amasaka. Oumenya mwisie, ninasi muye, omwenoyo yaamanga ebiamo ebinji; okhuba harali isie shimunyala okhukhola eshindu shiosi tawe. 6Omundu naba naramenya mwisie ta, asukunwa shinga lisaka, naniala; abandu nibakakhung'aasia, nibakasukuna mumulilo, nikasambwa. 7Nimuba nimumenya mwisie, amakhuwa kanje nako nikamenya mwinywe, musabe liosi elia mwenya, nalio lilamukholelwa. 8Mwikhuwa lino Papa aheebungwa oluyali, mbu olwa mwamanga ebiamo ebinji; khandi murio mulaba abeechi banje. 9Shinga Papa olwa yambeelile isie, siesi ndamuheelile inywe endio; menye mubuheeli bwanje. 10Nimuba nimuhulilanga amalako kanje, mulamenyanga mubuheeli bwanje; sbinga isie olwa ndahuliilenje amalako kaPapa, nimenya mubuheelibwe. 11Amakhuwa kano emubooleele, mbu okhwikhoya khwanje khube mwinywe, khandi mbu okhwikhoya khweenywe khwitsule.
12Lino nilio lilako lianje, mbu muheelanenje, shinga isie olwa ndamuheelile inywe. 13Abulaho ouli nobuheeli obushila buno, mbu omundu okhuhaana obulamubwe khulwa abeetsabe. 14Inywe muli abeetsa banje nimuba nimukhola akeenako aka emulaka. 15Shimulanga abasumba khandi tawe; okhuba omusumba shiamanyanga aka omwamiwe akhola ta; ne emulanjile inywe mbu abeetsa; okhuba kosi aka ndahuliile khuPapa ndamumanyiye. 16Inywe shimwayandobola isie ta, habula isie ndamulobola inywe, nimuraho, mbu mutsie mwame ebiamo, khandi mbu ebiamo bieenywe bimenye; mbu likhuwa liosi elia mulasaba Papa muliira lianje, amuheelesie. 17Amakhuwa kano emulaka, mbu mana muheelanenje.
Obukiyi bweshialo
18Eshialo nishiba nishimukiya, mumanyile mbu siesi shiangiya khale, nishishili okhumukiya inywe. 19Nimwakhabeele abeshialo, khane eshialo shiakhaheelile abali abashione shichila shimuli abeshialo ta, habula ndamulobola mushialo, niko akachila eshialo nishimukiya. 20Yitsulile likhuwa elia ndamuboolela, mbu omusumba shiashila omwamiwe ta. Nibaba nibasandia isie, nineenywe balamusandia mwesi; nibaba nibahulila likhuwa lianje, balahulila nende akeenywe nako. 21Ne amakhuwa ako kosi balamukholela khulwa eliira lianje shichila shibamumanya oyo owanduma ta. 22Nimba nindarakheetsile nisungana ninabo, khane shibakhabeele nobwonooni tawe; ne bulaano shibali nende eshia baboola khubwonooni bwabwe ta. 23Oungiya isie amukiya nende Papa yesi. 24Nimba nindakhakholile mubo emilimo echia oundi yesi arakhola ta, khane shibakhabeele nobwonooni tawe; ne bulaano baluutsi nibakiya isie khandi nende Papa. 25Ne kano keekhola mbu likhuwa eliahandiikwa mumalako kabwe liusibwe, mbu Bangiya harali eshifune ta. 26Ne olwa Omuhabini oyo alaba niyeetsile, owa ndalamurumila okhurula khuPapa, niye Roho wobwatoto, owitsa narula khuPapa, ye alandumbulila akobuloli; 27nineenywe mwesi murumbula akobuloli, shichila mwabeelenje ninasi halala okhurula khukhuchaaka.
ទើបបានជ្រើសរើសហើយ៖
Yohana 15: OUV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Oluluyia Union Version © Bible Society of Kenya 1975
