Markus 13
13
Yesu a ghwalza laghwaram ujek kwakwas
1Maa Yesu a kadamha aza a ujek kwakwas ca, ɗala teŋguleŋ ŋ taba madarlaŋw anta ege, a zlepene, a ŋgaya: «Masasərak, sarza dadaɓ ŋkəɗaŋ ŋghe ey lalam ŋghe ege may!» 2A təwse ca, Yesu a zenene, a ŋgaya: «Hwa kegəre ujek malamalam ma dakal dakal ŋghe ege vaw, sa ya? Kaw ŋkəɗaŋ a kenemenha ata ŋkəɗaŋ, askwaw, əy naghwaramzata aza tewtew.»
3A təwse ca, Yesu kénjeye ata barla Mpe Jaytun, kághwal tama aka kəɗa aha ujek kwakwas. Ata Pəyer, Yakuba, Yuhana leŋ Andəyre əy gagaha ara mbe, Aya, əy ɗawza, əy ŋgaya: 4«Ghwelzeney, səkan anta ege əy nalaha ca, vepey? Səkan ma kanaghwalza, səkan anta ege maa əy kala tew ca, vemey?»
Gef ey ŋgwesem ege
5Yesu a zlepetene, a ŋgaya: «Hune sla ka, kaw ɗala a ɗaw ŋ fətekzahune aza səkwaw. 6Hejəye vəram əy nandaha a zlam naka, əy nazlap, əy ŋgaya: “Ara sa”, aya, əy nefətekzata hejəye aza vəram. 7Mada hune kezləme gham ege əy kaɗa, askwaw ca, labara ata gham ege ca, hune ɗaw ŋ lalak səkwaw, mavəday, səy səkan anta ege əy mala tata. Cemey, ara laŋtakw manhayak kwagwa səkwaw. 8Hayak wende a naɗa gham a hayak wende, bay wende a naɗa gham a bay wende, hayak ege əy nahəɓal ata la vedəye vedəye, metes a nala. Səkan anta ege əy nanja ana ledew lusah wala ma kaɗaw ŋ mbaw. 9Hune sla ka kadak kadak. Əy nejeɓzahune a tama laja guma ege, əy naŋtawahune ŋ ujek ma ata rak Gazlavay ege, əy nagarzahune a tama mambal hayak ege leŋ a tama bay ege mavəday sa, ndar hune zlap ata sa a tama tata. 10Cemey, səy Ma Mewe ma Taŋtaŋ maghwalha aza ŋ hejəye ma ŋ manhayak ege tewtew kwagwa. 11Mada, əy kejeɓzahune a tama hejəye maja guma ege ca, hune ɗaw ŋ deŋ ŋkwaɓ ata ma maa hune kanazlap səkwaw. Cemey, mada vah anta kándaha aza ca, hune zlap ma maa hune lemew, mavəday, ara hune ma kazlap səkwaw, cemey, ara Zəwet ma keweɗ. 12Hejəye əy navalzata zlaŋgan tata ege aza ŋ ja, cen mbaw, a nelene ŋ mba anta ana mbe yam. Uzəye əy naɗa gham a cen tata əy maman tata ege, əy najata aza. 13Hejəye tewtew əy kanaŋgəlay nje a hune səkwaw mavəday zlam naka. Cemey, ɗala ma sew gef anta aza hwas ata laŋtakw ca, heje anta a nereh.»
Hejəye əy naŋgwav mambaza
14Yesu a zlepetene zeney, a ŋgaya: «Hune negəre Səkan ma kadak səkwaw, Magay la kégereye ata la maa keɗe kadak ŋ gar səkwaw. Heje ma jəŋge ma ŋgha anta ca, masan ka kadak kadak! Aya, hejəye ma ŋ Yahudəya ege əy mehey ŋ barla ege, 15ɗala ma kénjeye mgba ata dəres ma ata ha ujek ca, a ɗaw ŋ tadakwha aza, ŋ dam a ujek ŋ da səkan səkwaw, 16ɗala maa mbəy ŋ la a damaw ca, a ɗaw ŋ zenha a wata ŋ ŋta rəgwac anta səkwaw. 17Ata vah anta ege ca, gef a nandaha ata weləye ma a dəmas ege leŋ weləye ma kesetene wa ŋ uzəye. 18Hune rak Gazlavay, ndar səkan anta ege əy ɗaw ŋ laha a vəya səkwaw. 19Mavəday, pes anta ege ca, ara pes ma ata sa gef. Kaw ɗala kégəre ŋseŋ gef anta, mar aka ata lamar, maa Gazlavay a baza manhayak ha na ŋgha, askwaw. Cemey, kaw gef a kanalaha ana mbe zeney ca, askwaw. 20Mada kəɗe Gazlavay, Bay Madakal kézlezene wan anta ege aza, mavəday hejəye anta ege maa a mayata, askwaw ca, kaw ɗala ma kenereh, askwaw. 21Aya, ata vah anta ca, mada ɗala a zlapahune, a ŋgaya: “Almasəyhu, mbəy cakwa ete ŋghe!” askwaw ca, “Mbəy a ŋge ŋghe ca,” hune ɗaw ŋ lamza ma anta səkwaw. 22Mavəday, hejəye ma əy kazlap, əy ŋgaya, tata almasəyhu ege, askwaw ca, tata uzəye ma zlap ma ege, əy nandaha, əy nala zaɓəla ege ŋ kuɗapzata hejəye aza. Mada kəɗe əy kula ca, əy nakuɗapzata kaw hejəye maa Gazlavay a mayata ege aza. 23Ŋkune ca, hune sla ka, sa kághwalzahune səkan anta ege aza tewtew.»
Landaha Mba Ɗala
24Yesu a zlap zeney, a ŋgaya: «Ata vah wese anta ege, a dəwze maa hejəye əy kasa gef aza ca, pes a najaɓ, ŋtəra a keneweɗ zeney, askwaw, 25gamzla ma mgba ata uzlaf ege, əy nakwayaha aza ata hayak leŋ ɓardakw ma mgba ata uzlaf ege əy nahəɓal. 26Aya, heje negəre Mba Ɗala a kandaha ŋ mahwabakw ghef a ɓarɓar leŋ a ɓardakw. 27A təwse ca, a nalaɓzata malaɓ ege ŋ manhayak tewtew ata kəva ege ŋfaɗ tata. Əy neɓecata hejəye maa a mayata ege, mar aka ata lamar manhayak ha hwas ata laŋtakw.»
Lasasərak maa səke a kaghwalza
28Yesu a zlap zeney, a ŋgaya: «Hune teh zlam ata lasasərak maa səke a kaghwalza. Mada zləram ege əy kaja, vejeɗ a kaja ca, hune kasan ca, vəya slaɓ. 29A nja ana mbe, hune yam, mada hune kegəre səkan ŋghe anta ege əy kala ca, hune san ka, Mba Ɗala slaɓ ŋ ndaha, mbəy a ma ujek ŋkune. 30Sa kazlapahune njenjəwen, səkan ŋghe anta ege tewtew əy nala ca, hejəye ma na ŋgha ege əy kanamac tata tewtew kwagwa askwaw. 31La ma ata uzlaf ey la ma ata hayak ca, əy natuwaɗ, cemey, zlap naka ege ca, əy kanatuwaɗ askwaw. 32Cemey, pes anta, askwaw ca, walaŋ anta ca, kaw ɗala a kasanaw, askwaw, kaw malaɓ mala Gazlavay ma mgba ata uzlaf ege, kaw Mba anta, kaw ɗala askwaw, səy Vana teŋguleŋ anta ma kasan wan anta.»
Hune sla ka
33Yesu a zlap zeney, a ŋgaya: «Hune sla ka, hune ɗaw ŋ wan ŋkune, səkwaw, mavəday hune kasan vah maa səkan anta a nala səkwaw. 34Səkan anta a nalaha ca, ana ɗala ma a kanda ŋ ŋcəwerha, a yakza wata anta aka, a valza aka asa ra mala zlan anta ege, kaw vayay a zlan anta. Aya, a zlepene ŋ heje mahəbar ma ujek, a ɗaw ŋ wan anta səkwaw. 35Ana ebe ŋghe, hune ɗaw ŋ wan ŋkune səkwaw, mavəday, hune kasan vah maa təwjek a kanandaha səkwaw. Ketegəre a nandaha mala mackwahw, askwaw ca, ŋ taba zaɗaw, askwaw ca, maa gamzakw a kaja ula, askwaw ca, mala mapat, ca, hune kasan səkwaw. 36Mada a zenha hwaf ende ŋghe ca, a ɗaw ŋ ndewzahune, hune káwan ŋkune səkwaw. 37Ma maa sa kazlapahune ŋghe ca, sa kezlepetene ŋ hejəye tewtew, hune ɗaw ŋ wan ŋkune səkwaw.»
ទើបបានជ្រើសរើសហើយ៖
Markus 13: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL